ടോക്കിയോ പാരാലിമ്പിക്സിൽ രാജ്യത്തിന് സ്വർണമെഡൽ സമ്മാനിച്ച ഷൂട്ടർ അവനി ലേഖരയ്ക്ക് പ്രത്യേകമായി നിർമ്മിച്ച എക്സ് യുവി 700 എസ് യുവി സമ്മാനിച്ച് മഹീന്ദ്ര ആൻഡ് മഹീന്ദ്ര. നിർമ്മാതാക്കൾക്ക് നന്ദി അറിയിച്ചുകൊണ്ട് അവനി ലേഖര തന്റെ പുതിയ വാഹനത്തിന്റെ ചിത്രങ്ങൾ ട്വിറ്ററിൽ പങ്കുവെച്ചു.
2021ലെ ടോക്കിയോ പാരാലിമ്പിക്സിൽ സ്വർണ മെഡൽ കരസ്ഥമാക്കുന്ന ആദ്യ ഇന്ത്യൻ വനിതയായിരുന്നു അവനി ലേഖര. തുടർന്ന് താരത്തിന് ഉപയോഗിക്കാൻ പ്രാപ്തമായ വിധത്തിൽ പ്രത്യേകം രൂപകൽപ്പന ചെയ്ത മഹീന്ദ്ര എസ് യുവി 700 ലിമിറ്റഡ് എഡിഷൻ സമ്മാനിക്കുമെന്ന് മഹീന്ദ്ര ആൻഡ് മഹീന്ദ്ര ഗ്രൂപ്പ് ചെയർമാൻ ആനന്ദ് മഹീന്ദ്ര അറിയിച്ചിരുന്നു. അവനിക്ക് സമ്മാനിച്ച ഈ വാഹനം രൂപകൽപ്പന ചെയ്തത് മഹീന്ദ്രയുടെ ഗ്ലോബർ പ്രൊഡക്ട് ഡെവലപ്മെന്റ് മേധാവി ആർ വേലുസ്വാമിയാണ്. മഹീന്ദ്ര കഴിഞ്ഞയിടെ പുറത്തിറക്കിയ എക്സ് യുവി 700യുടെ രൂപകൽപ്പനയ്ക്ക് പിന്നിലും വേലുസ്വാമി തന്നെയാണ്. താരത്തിന് വാഹനത്തിൽ അനായാസം കയറാനും ഇറങ്ങാനും സാധിക്കും
ഒളിമ്പിക്സിലും പാരാലിമ്പിക്സിലും വിജയം കൈവരിച്ച ഇന്ത്യൻ അത്ലറ്റുകൾക്ക് പാരിതോഷികം നൽകാൻ മഹീന്ദ്ര തീരുമാനിച്ചിരുന്നു. ഇതിന്റെ ഭാഗമായി കഴിഞ്ഞ വർഷം നീരജ് ചോപ്രയ്ക്ക് എക്സ് യുവി 700 സുവർണ എഡിഷൻ സമ്മാനിച്ചിരുന്നു. അവനിക്ക് സമ്മാനിച്ച വാഹനത്തിന്റെ ഗ്രില്ലിനും ഗോൾഡൻ കളർ പൂശിയിട്ടുണ്ട്. അവനിക്ക് ഉപയോഗിക്കാൻ സാധിക്കുന്ന തരത്തിലാണ് വാഹനത്തിന്റെ ഡ്രൈവിംഗ് സീറ്റുകൾ തയ്യാറാക്കിയിരിക്കുന്നത്. വാഹനം തുറന്നാൽ ഉളളിൽ നിന്നും സീറ്റുകൾ പുറത്തേക്ക് തളളിവരുന്ന സംവിധാനമാണ് എടുത്തുപറയേണ്ടത്. ഇതിലൂടെ വീൽചെയറിലേക്കോ മറ്റ് ഇരിപ്പിടങ്ങളിലേക്കോ ഈസിയായി മാറാനും അവനിക്ക് കഴിയും.
ഷൂട്ടിംഗിലാണ് അവനി ഇന്ത്യക്കായി സ്വർണ മെഡൽ കരസ്ഥമാക്കിയത്. ഇതിനാൽ തന്നെ അതിന്റെ ഓർമ്മപ്പെടുത്തലായി പ്രത്യേകം തയ്യാറാക്കിയ സ്റ്റിക്കറുകൾ വാഹനത്തിന്റെ വശങ്ങളിലും, പിൻഭാഗത്തും നൽകിയിട്ടുണ്ട്. വാഹനത്തിന്റെ മുൻവശത്തെ വെർട്ടിക്കൽ ഗ്രിൽ സ്ലാട്ടുകളിലും പിൻഭാഗത്തെ ഡെക്കലുകളിലും ബ്രാൻഡ് ലോഗോയിലും കാണാവുന്ന ഒരു സ്വർണ്ണ നിറമാണ് പ്രത്യേക പതിപ്പിൽ കാണാൻ സാധിക്കുന്നത്. വാഹനത്തിന്റെ അകത്തും ഇത്തരത്തിലുള്ള ഒരു ഗോൾഡൻ ടച്ച് നിർമ്മാതാക്കൾ നൽകിയിട്ടുണ്ട്. എക്സ് യുവി700യുടെ മറ്റ് സൗകര്യങ്ങൾ സാധാരണ മോഡലിലെ പോലെ മാറ്റമില്ലാതെ തുടരും.
കഴിഞ്ഞ വർഷമാണ് മഹീന്ദ്ര ആൻഡ് മഹീന്ദ്ര എക്സ് യുവി 700 പുറത്തിറക്കിയത്. 12.49 ലക്ഷമാണ്( എക്സ് ഷോറൂം വില) പ്രാരംഭ വില. പെട്രോൾ, ഡീസൽ എഞ്ചിനുകളാണ് വാഹത്തിനുള്ളത്. 2.0 ലിറ്റർ എംസ്റ്റാലിയൻ ടർബോചാർജ്ഡ് പെട്രോളും 2.2 ലിറ്റർ എംഹൗക്ക് ഡീസലും. ട്രാൻസ്മിഷൻ ഓപ്ഷനുകളിൽ 6 സ്പീഡ് മാനുവൽ അല്ലെങ്കിൽ 6 സ്പീഡ് ഓട്ടോമാറ്റിക് ടോർക്ക് കൺവെർട്ടർ യൂണിറ്റ് ഉൾപ്പെടും. സുരക്ഷയുടെ കാര്യത്തിലും മികച്ച പ്രകടനം കാഴ്ചവെച്ച മോഡലാണിത്. ഗ്ലോബൽ എൻസിഎപിയുടെ ക്രാഷ് ടെസ്റ്റിൽ 5-സ്റ്റാർ റേറ്റിംഗാണ് വാഹനം സ്വന്തമാക്കിയത്.
Comments