നല്ല ചൂട് മസാല ദോശ, ചമ്മന്തിയും, സാമ്പാറും കുട്ടി കഴിക്കാൻ എന്ത് രസമാണല്ലേ? കേൾക്കുമ്പോൾ തന്നെ നാവിൽ വെള്ളമൂറും. മസാല ദോശകളിൽ ചില പരീക്ഷണങ്ങൾ നടത്തി പുതിയ വിഭവങ്ങൾ സൃഷ്ടിക്കുന്നതിനെ കുറിച്ചും നമ്മൾ കേട്ടിട്ടുണ്ട്. എന്നാൽ, ഈ മസാല ദോശയുടെ ‘അതി ഭയാനകമായ’ ഒരു കോമ്പിനേഷനാണ് സമൂഹമാദ്ധ്യമങ്ങളിൽ ഇപ്പോൾ വൈറലായിരിക്കുന്നത്.
മസാല ദോശ ഐസ്ക്രീം റോളാണ് ആ വൈറൽ വിഭവം. ഡൽഹിയിലെ ഒരു ഭക്ഷണശാലയിലാണ് ഈ ‘പ്രത്യേക വിഭവം’ തയ്യാറാക്കുന്നത്. മറ്റൊരു സ്പെഷ്യാലിറ്റി എന്തെന്നാൽ, ഇവിടെ മാത്രമേ നിലവിൽ ഈ വിഭവം ലഭിക്കൂ. ദി ഗ്രേറ്റ് ഇന്ത്യൻ ഫുഡി എന്ന ഇൻസ്റ്റഗ്രാം അക്കൗണ്ടിലാണ് മസാല ദോശ ഐസ്ക്രീം റോളിന്റെ വീഡിയോ പോസ്റ്റ് ചെയ്തിരിക്കുന്നത്.
ഒരാൾ മസാല ദോശ നന്നായി പൊടിച്ച്, അതിൽ ചില ചേരുവകൾ ചേർത്ത് പിന്നീട് ഇതിലേയ്ക്ക് വാനില ഐസ്ക്രീം ചേർക്കുന്നത് ദൃശ്യങ്ങളിൽ കാണാം. ശേഷം ഇത് നന്നായി യോജിപ്പിക്കുന്നു. പിന്നീട് ഇവ റോളുകളാക്കി അതിന് മുകളിലേയ്ക്ക് ഉരുളക്കിഴങ്ങ് കറിയും ഒപ്പം ചട്നിയും ചേർത്ത് കഴിഞ്ഞാൽ മസാല ദോശ ഐസ്ക്രീം റോൾ തയ്യാർ. ഡൽഹി കാ സ്പെഷ്യൽ മസാല ദോശ ഐസ്ക്രീം എന്ന അടിക്കുറിപ്പോടെയാണ് വീഡിയോ പങ്കുവെച്ചിരിക്കുന്നത്.
ദൃശ്യങ്ങൾ വൈറലായതോടെ ആളുകൾ പ്രതികരണവുമായി രംഗത്തെത്തി. ദോശ പ്രേമികളുടെ മനസ്സ് വേദനിപ്പിക്കുന്ന വിഭവം എന്നും, യഥാർത്ഥ മസാല ദോശ ഇത് കണ്ടാൽ തൂങ്ങിമരിക്കുമെന്നും എല്ലാമാണ് ആളുകൾ അഭിപ്രായപ്പെടുന്നത്. ധാരാളം ആളുകളാണ് ഈ മസാല ദോശ ഐസ്ക്രീം റോളിനെ കളിയാക്കിയത്.
