ഷിംല: ഹിമാചല് പ്രദേശില് മലയിടിച്ചിലില് ടാക്സി മണ്ണിനടിയിലായി 13 പേര് മരിച്ചു. ലാഹോള്-സ്പിതി ജില്ലയിലെ ഉദയ്പുര്പംഗി റോഡിലെ കാഡു നാളയ്ക്ക് സമീപമാണ് ദാരുണ അപകടമുണ്ടായത്. അപകടത്തില്പ്പെട്ട ടാക്സിയിലുണ്ടായിരുന്ന 15 പേരില് ഒരാളെ ഗുരുതര പരിക്കുകളോടെ രക്ഷപ്പെടുത്തി ആശുപത്രിയില് പ്രവേശിപ്പിച്ചു. ശേഷിക്കുന്നവര്ക്കായുള്ള തിരച്ചില് തുടരുകയാണെന്ന് അധികൃതര് അറിയിച്ചു.
ഓടിക്കൊണ്ടിരുന്ന ടാക്സിയുടെ മുകളിലേക്ക് മലയുടെ വലിയൊരു ഭാഗം പെട്ടെന്ന് ഇടിഞ്ഞുവീഴുകയായിരുന്നു. പാറക്കല്ലുകളും മണ്ണും വാഹനത്തിന് മുകളിലേക്ക് പതിച്ചതോടെ ടാക്സി പൂര്ണമായും മണ്ണിനടിയിലായി. യാത്രക്കാര്ക്ക് രക്ഷപ്പെടാന് അവസരം പോലും ലഭിച്ചില്ലെന്നാണ് പ്രാഥമിക നിഗമനം.
മണ്ണിടിച്ചിലിനെ തുടര്ന്ന് ഒരു ദിവസം അടച്ചിട്ടിരുന്ന റോഡ് വെള്ളിയാഴ്ചയാണ് വീണ്ടും ഗതാഗതത്തിനായി തുറന്നത്. ഇതിന് പിന്നാലെയാണ് അപകടമുണ്ടായത്. റോഡ് അടച്ചിരുന്നതിനാല് ടിന്ഡിയില് കുടുങ്ങിക്കിടന്നിരുന്ന യാത്രാസംഘം പംഗി താഴ്വരയിലേക്കുള്ള യാത്ര പുനരാരംഭിച്ചതിന് തൊട്ടുപിന്നാലെയാണ് ദുരന്തം സംഭവിച്ചത്.
അപകടത്തില്പ്പെട്ട വാഹനത്തില് ആകെ 15 യാത്രക്കാരുണ്ടായിരുന്നുവെന്ന് പോലീസ് അറിയിച്ചു. ഇവരില് ഭൂരിഭാഗവും പംഗി താഴ്വരയിലേക്കുള്ള യാത്രക്കാരാണെന്നാണ് വിവരം. ദുരന്തമേഖലയില് രക്ഷാപ്രവര്ത്തനം പുരോഗമിക്കുകയാണെന്നും കൂടുതല് ആളുകളെ കണ്ടെത്താനുള്ള ശ്രമം തുടരുകയാണെന്നും അധികൃതര് വ്യക്തമാക്കി.
