ഡൽഹി : മുഖ്യമന്ത്രി സ്ഥാനാർത്ഥിത്വത്തിൽ നിന്നും പ്രിയങ്ക വാദ്ര പിന്മാറിയത് പരാജയ ഭീതി കൊണ്ടാണോ എന്ന് പരിഹസിച്ച് ബി ജെ പി . കോൺഗ്രസ്സിന്റെ മുഖ്യ മന്ത്രി സ്ഥാനാർത്ഥിയാകുമെന്ന് അവകാശപ്പെട്ടിട്ടില്ലെന്ന പ്രിയങ്കയുടെ പ്രസ്‌താവനയെ യുപി ഉപമുഖ്യമന്ത്രി കേശവ് പ്രസാദ് മൗര്യ പരിഹസിച്ചു .
പരാജയഭീതി കൊണ്ടാണ് പ്രിയങ്ക പ്രസ്താവന തിരുത്തിയതെന്നും ,കോൺഗ്രസ് പരാജയപ്പെടുമെന്ന് പ്രിയങ്കയ്ക്ക് അറിയാമെന്നും കേശവ് പ്രസാദ് മൗര്യ പറഞ്ഞു . രാഹുലിന് അമേഠി നഷ്ടമായി. പ്രിയങ്കയ്ക്ക് എവിടെനിന്നു മത്സരിക്കണമെന്നും പോലും അറിയില്ല. അത് കൊണ്ടാണ് പ്രിയങ്ക തന്റെ പ്രസ്താവന തിരുത്തിയതെന്നും അദ്ദേഹം പരിഹസിച്ചു .
യുപി കോണ്‍ഗ്രസില്‍ തന്റെ മുഖമല്ലാതെ മറ്റാരുടെയെങ്കിലും മുഖം കാണുന്നുണ്ടോയെന്ന് കഴിഞ്ഞ ദിവസം
പ്രിയങ്ക മാദ്ധ്യമ പ്രവർത്തകരോട് ചോദിച്ചിരുന്നു .യുപിയില്‍ കോണ്‍ഗ്രസിന്‍റെ മുഖ്യമന്ത്രി സ്ഥാനാര്‍ഥിയായുള്ള പ്രിയങ്കയുടെ പ്രഖ്യാപനമാണിതെന്ന വാർത്തകൾ വന്നതോടെ വിശദീകരണവുമായി പ്രിയങ്ക രംഗത്ത് വന്നിരുന്നു . തന്റെ പ്രസ്താവന തെറ്റായി വ്യാഖ്യാനിച്ചെന്നും , മാദ്ധ്യമ പ്രവർത്തകർ തുടർച്ചയായി ചോദ്യങ്ങൾ ഉന്നയിച്ചപ്പോൾ നൽകിയ മറുപടിയായിരുന്നു അതെന്നുമായിരുന്നു വിശദീകരണം .
തിരഞ്ഞെടുപ്പ് തന്ത്രങ്ങളുമായി കേന്ദ്ര ആഭ്യന്തരമന്ത്രി അമിത് ഷാ ഉത്തർ പ്രദേശിലെത്തിയതോടെ ബി ജെ പി ക്യാമ്പുകൾ ആവേശത്തിലാണ് . കൈരാനയിലെത്തിയ അമിത് ഷാ ‘ഡോർ -ടു -ഡോർ ‘ പ്രചാരണത്തിൽ പങ്കാളിയായി .
