വാഷിങ്ടണ്‍: പ്രശസ്തരുടെ പ്രസ് മീറ്റുകള്‍ ചിലപ്പോള്‍ സംഭവബഹുലമാകാറുണ്ട്. കടക്കൂ പുറത്തെന്ന് പിണറായി വിജയന്‍ പറഞ്ഞത് ഓട്ടൊന്നുമല്ല ഒച്ചപ്പാടുണ്ടാക്കിയത്.
സമാനമായ വാര്‍ത്തയാണ് അമേരിക്കയില്‍ നിന്നു വരുന്നത്. വൈസ്റ്റ്ഹൗസില്‍ നടന്ന പത്രസമ്മേളനത്തിനിടെയായിരുന്നു സംഭവം. പത്രസമ്മേളനം അവസാനഘട്ടത്തിലേക്ക് കടക്കുന്നതിനിടെ ഒരുപത്രപ്രവര്‍ത്തകന്‍ ചേദിച്ച ചോദ്യമാണ് ബൈഡനെ ചൊടിപ്പിച്ചത്.
പണപ്പെരുപ്പം രാഷ്‌ട്രീയ ബാധ്യതയാണോയെന്ന ഫോക്‌സ് ന്യൂസ് റിപ്പോര്‍ട്ടര്‍ പീറ്റര്‍ ഡൂസി ചോദിച്ച ചോദ്യമാണ് ബൈഡനെ പ്രകോപിപ്പിച്ചത്. അല്ല, അതൊരു ആസ്തിയാണന്നായിരുന്നു ബൈഡന്റെ മറുപടി. തുടര്‍ന്ന് മൈക്ക് ഓണായിരിക്കുമെന്ന് ഓര്‍ക്കാതെ മന്ദബുദ്ധിയുടെ മകനെന്ന് വിളിച്ച് അധിക്ഷേപിച്ചു. പിന്നീട് ഒരു മണിക്കൂര്‍ കഴിഞ്ഞ് ബൈഡന്‍ തന്നെ വിളിച്ച് ക്ഷമാപണം അറിയിച്ചതായി ഡൂസി പറഞ്ഞു. ഇത് വ്യക്തിപരമായ അധിക്ഷേപമല്ലെന്നും ബൈഡന്‍ പറഞ്ഞു. തുടര്‍ന്നു നടന്ന സംഭാഷണത്തില്‍ താന്‍ മറ്റുള്ളവരില്‍ നിന്നു വ്യത്യസ്തമായ ചോദ്യങ്ങള്‍ ചോദിക്കാന്‍ ആഗ്രഹിക്കുന്നതായി ഡൂസി പറഞ്ഞു. അതെ സമയം അദ്ദേഹം മാപ്പ് ചോദിക്കേണ്ട കാര്യമില്ലെന്നും മാദ്ധ്യമപ്രവര്‍ത്തകന്‍ പറഞ്ഞു.
എന്നാല്‍ ഇത് ആദ്യമായല്ല ബൈഡന്‍ മാദ്ധ്യമപ്രവര്‍ത്തകരുടെ ചോദ്യത്തിന് പ്രകോപിതനാവുന്നതും അവരെ തിരിച്ചുവിളിക്കുന്നതും. കഴിഞ്ഞ ദിവസം മറ്റൊരു ഫോക്‌സ് ന്യൂസ് വനിത മാദ്ധ്യമപ്രവര്‍ത്തകയുടെ ചോദ്യത്തിനും സമാനമായ മറുപടി നല്‍കി. സമാധാനത്തിനുള്ള ആദ്യനീക്കത്തിന് എന്തിനാണ് റഷ്യന്‍ പ്രസിഡന്റിനെ കാത്തിരിക്കുന്നത് എന്ന ചോദ്യത്തിന് എന്തൊരു വിഡ്ഡിച്ചോദ്യം എന്നായിരുന്നു ബൈഡന്റെ മറുപടി.
അതെ സമയം മുഖ്യമന്ത്രി പിണറായി വിജയന്റെ അമേരിക്കന്‍ സന്ദര്‍ശനത്തിന്റെ ചുവടുപിടിച്ചാണ് ട്രോളര്‍മാര്‍ ഇതിനെ കാണുന്നത്. പിണറായി എഫക്ട് എന്നും കടക്കു പുറത്തിന്റെ ബൈഡന്‍ വകഭേദം എന്നും ഈ സംഭവത്തെ ട്രോളുകയാണ്.
