ദുബായ്: ദുബായ് എക്സ്പോ വേദി കാണാൻ ഫുട്ബോൾ ഇതിഹാസം ക്രിസ്റ്റ്യാനോ റൊണാൾഡോ എത്തി. ആയിരങ്ങളാണ് പ്രിയ താരത്തെ കാണാൻ എത്തിച്ചേർന്നത്. അൽ വാസൽ പ്ലാസയിൽ സംഘാടകർ നടത്തിയ പ്രത്യേക പരിപാടിയിൽ ക്രിസ്റ്റ്യാനോ റൊണാൾഡോ ആരാധകരുമായി സംവദിച്ചു.
പ്രിയപ്പെട്ട നഗരങ്ങളിലൊന്നായ ദുബായിലേക്ക് വീണ്ടുമെത്താനായതിന്റെ സന്തോഷത്തിലായിരുന്നു ക്രിസ്റ്റ്യാന്യോ റൊണാൾഡോ. ദുബായ് ചെയ്യുന്നതെന്തും അതിശയകരവും ആകർഷണീയവുമാണ്. ഇതെങ്ങനെ സാധ്യമാക്കുന്നുവെന്ന കാര്യത്തിൽ എപ്പോഴും അതിശയം തോന്നിയിരുന്നുവെന്ന് ക്രിസ്റ്റ്യാനോ പ്രതികരിച്ചു. യു.എ.ഇ.യെകൂടാതെ ഒമാൻ, കുവൈത്ത്, ഇന്ത്യ എന്നിവിടങ്ങളിൽ നിന്നുള്ള ആരാധകരും പ്രിയതാരത്തെ കാണാൻ അൽ വാസൽ പ്ലാസയിൽ തടിച്ചുകൂടിയിരുന്നു.
ക്രിസ്റ്റ്യാനോയുടെ ഫോട്ടോ പ്രിന്റ് ചെയ്ത ജഴ്സിയും ടീ-ഷർട്ടും ധരിച്ചായിരുന്നു പലരും എത്തിയത്. കഴിഞ്ഞ കുറച്ച് ദിവസങ്ങളായി ദുബായിലുള്ള താരം വ്യാഴാഴ്ച യു.എ.ഇ. വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂം, ദുബായ് കിരീടാവകാശിയും എക്സിക്യുട്ടീവ് കൗൺസിൽ ചെയർമാനുമായ ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം എന്നിവരുമായി കൂടിക്കാഴ്ച നടത്തിയിരുന്നു.
ലയണൽ മെസ്സി എക്സ്പോ വേദി സന്ദർശിച്ചതിന് പിന്നാലെയാണ് ക്രിസ്റ്റ്യാനോയുടെ വരവ്. ക്രിസ്റ്റ്യാനോയോടൊപ്പം കുടുംബവും ദുബായിലുണ്ട്. ബീച്ചുകളിൽ കുടുംബത്തോടൊപ്പം ഉല്ലസിക്കുന്ന ചിത്രം താരം സാമൂഹികമാധ്യമങ്ങളിലൂടെ പങ്കുവെച്ചിരുന്നു. ടീമിന്റെ വിന്റർ ക്യാമ്പ് ദുബായിൽ നടക്കുന്നതുകൊണ്ട് ക്രിസ്റ്റ്യാനോക്ക് പുറമേ മാഞ്ചെസ്റ്റർ യുണൈറ്റഡിന്റെ മറ്റ് താരങ്ങളും എത്തിയിട്ടുണ്ട്. ഇവർക്ക് പുറമേ ആഴ്സനൽ ഉൾപ്പെടെ 16 ഫുട്ബോൾ ടീമുകൾ ദുബായിൽ ഈ മാസം പരിശീലനം നടത്തുന്നുന്നുണ്ട്.
Comments