കോട്ടയം;കൊറോണ മാനദണ്ഡങ്ങൾ കാറ്റിൽ പറത്തി കോൺഗ്രസ് നേതാവ് ഉമ്മൻ ചാണ്ടിക്ക് സ്വീകരണം നൽകി. സോളാർ കേസിലെ ആരോപണങ്ങളെതുടർന്ന് വിഎസ് അച്ഛുതാനന്ദനെതിരെ നൽകിയ മാനനഷ്ടക്കേസിൽ അനുകൂല വിധി ഉണ്ടായ ശേഷം ആദ്യമായാണ് ഉമ്മൻചാണ്ടി പുതുപള്ളിയിലെ വീട്ടിലെത്തുന്നത്. കോട്ടയത്തെ പ്രവർത്തകരാണ് സ്വീകരണം ഒരുക്കിയത്.
നിരവധി ആളുകളാണ് ഞായർ ലോക്ക്ഡൗൺ ലംഘിച്ച് പുതുപ്പള്ളിയിലെ വീട്ടിൽ എത്തിയത്.പടക്കം പൊട്ടിച്ചും മധുരം വിതരണം ചെയ്തും പ്രവർത്തകർ ആഘോഷം സംഘടിപ്പിച്ചു.
മുൻ ഡിസിസി അദ്ധ്യക്ഷൻ ജോഷി ഫിലിപ്പിന്റെ നേതൃത്വത്തിൽ ആയിരുന്നു ആഘോഷങ്ങൾ. കൊറോണ വ്യാപനം രൂക്ഷമായ കോട്ടയം ജില്ല സി കാറ്റഗറിയിലാണ് ഉൾപ്പെടുത്തിയിരിക്കുന്നത്
സോളാർ കേസുമായി ബന്ധപ്പെട്ട് വിഎസ് അച്യുതാനന്ദനെതിരെ മുൻ മുഖ്യമന്ത്രി ഉമ്മൻ ചാണ്ടി നൽകിയ കേസിലാണ് ഉമ്മൻ ചാണ്ടിക്ക് അനുകൂല വിധിയുണ്ടായത്. സോളാർ കേസിൽ ഉമ്മൻ ചാണ്ടി അഴിമതി നടത്തിയെന്ന വിഎസിന്റെ പ്രസ്താവനക്കെതിരെയാണ് ഉമ്മൻ ചാണ്ടി കോടതിയെ സമീപിച്ചത്. തിരുവനന്തപുരം സബ് കോടതിയാണ് കോൺഗ്രസ് നേതാവിന് അനുകൂലമായി വിധി പുറപ്പെടുവിച്ചത്. കേസിൽ അപ്പീൽ പോകുമെന്ന് വി എസ് വ്യക്തമാക്കിയിട്ടുണ്ട്.
