കോട്ടയം: ശബരിമല തീർത്ഥാടനത്തോടനുബന്ധിച്ച് തീർത്ഥാടകർക്ക് ആവശ്യമായ അടിസ്ഥാന സൗകര്യങ്ങൾ ഉറപ്പാക്കാൻ റെയിൽവേയുടെ മുന്നൊരുക്കങ്ങൾ വിലയിരുത്തി കേന്ദ്രമന്ത്രി സുരേഷ് ഗോപി. റെയിൽവേ മന്ത്രി അശ്വിനി വൈഷ്ണവിന്റെ നിർദ്ദേശപ്രകാരം ശബരിമലയുടെ പ്രധാന ഗേറ്റ്‌വേ റെയിൽവേ സ്റ്റേഷനുകളായ കോട്ടയം, ചെങ്ങന്നൂർ, കൊല്ലം എന്നിവിടങ്ങളിലാണ് അദ്ദേഹം സന്ദർശനം നടത്തുന്നത്. കോട്ടയം റെയിൽവേ സ്റ്റേഷനിലെ സന്ദർശനം പൂർത്തിയാക്കി.
ഈ വർഷം ശബരിമലയിലേക്ക് കൂടുതൽ തീർത്ഥാടകർ എത്താൻ സാധ്യതയുള്ളതിനാൽ സ്റ്റേഷനുകളിൽ അടിസ്ഥാന സൗകര്യങ്ങൾ മെച്ചപ്പെടുത്തുന്നതിനുള്ള ക്രമീകരണങ്ങൾ റെയിൽവേ നേരത്തേ ആരംഭിച്ചിട്ടുണ്ട്. തീർത്ഥാടകരുടെ തിരക്ക് നിയന്ത്രിക്കുന്നതിനും യാത്ര സുഗമമാക്കുന്നതിനുമുള്ള സംവിധാനങ്ങൾ വിലയിരുത്തുകയാണ് സന്ദർശനത്തിന്റെ ലക്ഷ്യം.
ചെങ്ങന്നൂരിൽ സൗകര്യങ്ങൾ വർധിപ്പിക്കും
ശബരിമല തീർത്ഥാടനകാലത്ത് പ്രധാന കേന്ദ്രമായ ചെങ്ങന്നൂർ റെയിൽവേ സ്റ്റേഷനിൽ കൂടുതൽ സൗകര്യങ്ങൾ ഒരുക്കുമെന്ന് സുരേഷ് ഗോപി പറഞ്ഞു. തീർത്ഥാടകരുടെ തിരക്ക് കണക്കിലെടുത്ത് ആവശ്യമായ ക്രമീകരണങ്ങൾ ശക്തമാക്കും. യാത്രക്കാരുടെ എണ്ണം വർധിക്കുന്ന സാഹചര്യമുണ്ടായാൽ കൂടുതൽ സ്പെഷ്യൽ ട്രെയിനുകൾ അനുവദിക്കുന്നതും പരിഗണിക്കും.
കഴിഞ്ഞ വർഷം ശബരിമല തീർത്ഥാടനത്തിനായി 180 സ്പെഷ്യൽ ട്രെയിനുകളാണ് അനുവദിച്ചത്. ഇത്തവണയും ആവശ്യകത വിലയിരുത്തിയശേഷം കൂടുതൽ ട്രെയിനുകൾ അനുവദിക്കുന്ന കാര്യത്തിൽ തീരുമാനമെടുക്കുമെന്നും അദ്ദേഹം അറിയിച്ചു.
കൂടുതൽ സ്റ്റേഷനുകൾ സന്ദർശിക്കും
വരും ദിവസങ്ങളിൽ ശബരിമല തീർത്ഥാടനവുമായി ബന്ധപ്പെട്ട മറ്റ് റെയിൽവേ സ്റ്റേഷനുകളും സുരേഷ് ഗോപി സന്ദർശിക്കും. തീർത്ഥാടകരുടെ യാത്ര കൂടുതൽ സുഗമമാക്കുന്നതിനുള്ള നടപടികൾ വിലയിരുത്തുന്നതിനൊപ്പം ശബരിമല റെയിൽവേ പാതയുമായി ബന്ധപ്പെട്ട വിഷയങ്ങളും പരിഗണിക്കും.
