പനാജി: പ്രധാനമന്ത്രി നരേന്ദ്രമോദിക്ക് വാക്കുകള് കൊണ്ട് ആദരവ് പകരുന്നതാണ് മധ്യപ്രദേശ് മുഖ്യമന്ത്രി ശിവരാജ്സിങ് ചൗഹാന്റെ വാക്കുകള്. അതിമാനുഷനാണ് മോദിയെന്നും അനര്ഗളമായി ഒഴുകുന്ന ശക്തിയുടെ അനന്തമായകലവറയാണ് മോദിയെന്നും അദ്ദേഹം വ്യക്തമാക്കി.
ഞാന് അദ്ദേഹത്തെ നോക്കുമ്പോള് ദൈവത്തിന്റെ അടയാളങ്ങള് അദ്ദേഹത്തില് കാണാനാവുന്നു. എങ്ങെയനൊണ് ഒരാള്ക്ക് അദ്ദേഹത്തെപ്പോലെ ജോലി ചെയ്യാന് കഴിയുക. ഇതിന് മുന്പ് ഒരു കോണ്ഗ്രസ് സര്ക്കാര് ഇവിടെയുണ്ടായിരുന്നു. നിങ്ങള് എവിടെയെങ്കിലും വികസനമെത്തിച്ചോയെന്നും കോണ്ഗ്രസുകാരോട് ശിവരാജ് സിങ് ചൗഹാന് ചോദിച്ചു. ഗോവ ദാബോലിന് അസംബ്ലി മണ്ഡലത്തില് ബിജെപി റാലിയെ അഭിസംബോധന ചെയ്തു സംസാരിക്കുകയായിരുന്നു അദ്ദേഹം.
ഞാനൊരു മുഖ്യമന്ത്രിയോ ബിജെപി പ്രവര്ത്തകനോ ആയതുകൊണ്ട് പറയുകയല്ല, ഈ വാക്കുകള് എന്റെ ഹൃദയത്തില് നിന്നുള്ളതാണ്. മോദിയെപ്പോലെ ഒരാള് പ്രധാനമന്ത്രിയായത് ഇന്ത്യയുടെ ഭാഗ്യമാണെന്നും അസാമാന്യവ്യക്തിത്വത്തിന് ഉടമയാണ് മോദിയെന്നും ചൗഹാന് പറഞ്ഞു. അതിമാനുഷനായ മോദി ആശയസമ്പന്നനുമാണെന്നും അദ്ദേഹം കൂട്ടിച്ചേര്ത്തു.
ഇന്ത്യയുടെ രാജ്യാന്തരനിലവാരം പുനസ്ഥാപിച്ചു. കോണ്ഗ്രസ് അധികാരത്തിലിരുന്നപ്പോള് വിദേശത്ത് ഒരുബഹുമാനവും ഇന്ത്യക്കാര്ക്ക് ലഭിച്ചിരുന്നില്ല. അഭിമാനത്തോടെ നോക്കിയിരുന്നില്ല, ഇന്ത്യ അഴിമതിയുടെ നാടെന്ന് ചര്ച്ചചെയ്യപ്പെട്ടു.
തെരഞ്ഞെടുപ്പിന് ശേഷം കോണ്ഗ്രസിനെ പ്രലോഭിപ്പിച്ച് വീണ്ടും അധികാരത്തില് തുടരുകയെന്നതാണ് ബിജെപി തന്ത്രമെന്ന് എഎപി നേതാവ് അരവിന്ദ് കെജരിവാള് കഴിഞ്ഞ ദിവസം വ്യക്തമാക്കിയിരുന്നു. നാലുദിവസത്തെ തെരഞ്ഞെടുപ്പ് പര്യടനത്തിനായി ഗോവയിലെ തീരദേശമേഖലയില് എത്തിയതായിരുന്നു അദ്ദേഹം.
ഗോവയെ സംബന്ധിച്ച് ഇതൊരു നിര്ണായക തെരഞ്ഞെടുപ്പാണ്. എഎപിക്ക് വോട്ട് ചെയ്താല് അഴിമതി രഹിത ഗോവയെ നല്കാം. മറിച്ച് ചെയ്താല് ഫലത്തില് അത് ബിജെപിക്കാണ് ഗുണം ചെയ്യുക. കോണ്ഗ്രസ് സ്ഥാനാര്ത്ഥികള് ജയിച്ചാലും അവര് ബിജെപിയില് ചേരുമെന്നും ഏഴുപേരെ ബിജെപി പണം കൊടുത്ത് കോണ്ഗ്രസില് ടിക്കറ്റില് മത്സരിപ്പിച്ചതായും കെജ്രിവാള് പറഞ്ഞു.
