കൂളിഡ്ജ്: ഐസിസി അണ്ടർ 19 ലോകകപ്പ് ക്രിക്കറ്റ് ഫൈനലിൽ ഇന്ത്യ ഇന്ന് ഇംഗ്ലണ്ടിനെ നേരിടും. 24 വർഷത്തിന് ശേഷമാണ് ഇംഗ്ലണ്ട് ഫൈനൽ കളിക്കുന്നത്. ഇന്ത്യൻ സമയം വൈകിട്ട് 6.30നാണ് മത്സരം. അണ്ടർ 19 ലോകകപ്പ് ചരിത്രത്തിൽ ഇന്ത്യയുടെ എട്ടാമത്തെ ഫൈനലാണ് ഇന്ന് നടക്കുന്നത്.
ഇതുവരെ നാല് തവണ(2000,2008,2012,2018) കിരീടം സ്വന്തമാക്കി ചരിത്രം കുറിച്ച ഇന്ത്യ അഞ്ചാം കിരീടം ലക്ഷ്യം വെച്ചാണ് ഇന്ന് മത്സരത്തിനിറങ്ങുന്നത്. സെമിയിൽ കരുത്തരായ ഓസ്ട്രേലിയയെ 96 റൺസിന് തോൽപ്പിച്ചാണ് ഇന്ത്യൻ ടീം ഇത്തവണ അണ്ടർ 19 ലോകകപ്പ് ഫൈനലിലെത്തിയത്.
1998ൽ കന്നി ലോകകപ്പ് നേടിയശേഷം ഇംഗ്ലണ്ട് അണ്ടർ 19 ഫൈനലിൽ എത്തുന്നത് ഇതാദ്യമാണ്. മത്സരത്തിന്റെ ചരിത്രത്തിൽ തുടർച്ചയായ നാലാം തവണ ഫൈനലിൽ പ്രവേശിക്കുന്ന ആദ്യ ടീം എന്ന റെക്കോർഡ് ഇന്ത്യ സ്വന്തമാക്കി കഴിഞ്ഞു. ടൂർണമെന്റിനിടെ ക്യാപ്റ്റൻ യഷ് ദൂൽ ഉൾപ്പെടെയുള്ളവർക്ക് കൊറോണ ബാധിച്ചെങ്കിലും എല്ലാ പ്രതിസന്ധികളും മറികടന്നാണ് ഇന്ത്യയുടെ ഫൈനൽ പ്രവേശം.
