ഗാന്ധിനഗർ: ശബ്ദമാധുര്യംകൊണ്ട് ഇന്ദ്രജാലം കാട്ടിയ ഇതിഹാസ ഗായിക ലതാ മങ്കേഷ്‌കറിന്റെ വിയോഗത്തിൽ രാജ്യം ദുഃഖത്തിലാഴ്ന്നിരിക്കുകയാണ്. ലതാജിയ്‌ക്ക് ഏറ്റവും അധികം അടുപ്പമുണ്ടായിരുന്ന വ്യക്തിയായിരുന്നു പ്രധാനമന്ത്രി നരേന്ദ്രമോദിയുടെ അമ്മ. മാതൃഭാഷ മറാഠിയായിരുന്നിട്ടും ആദ്യമായി ഗുജറാത്തി ഭാഷയിൽ പ്രധാനമന്ത്രിയുടെ മാതാവ് ഹീരാബെനിന് സ്‌നേഹപൂർവ്വം ലതാജി എഴുതിയ ഒരു കത്ത് ഗുജറാത്ത് സർക്കാർ പുറത്തുവിട്ടിരിക്കുകയാണ്.
2019 ജൂണിലാണ് ലതാജി പ്രധാനമന്ത്രിയുടെ അമ്മയ്ക്ക് കത്തയച്ചത്. രണ്ടാം തവണയും മോദി സർക്കാർ വൻ ഭൂരിപക്ഷത്തോടെ അധികാരത്തിൽ എത്തിയതിന്റെ സന്തോഷവും അഭിമാനവും പ്രകടിപ്പിച്ചുകൊണ്ടുള്ള ലതാ മങ്കേഷ്‌കറിന്റെ കത്താണ് സർക്കാർ പുറത്തുവിട്ടത്.
‘അമ്മയുടെ പുത്രനും എന്റെ അനുജനുമായ നരേന്ദ്ര ഭായിയുടെ വിജയത്തിൽ ഞാൻ ഏറെ അഭിമാനം കൊള്ളുന്നൂ. ഭഗവാൻ ശ്രീ രാമൻ എന്നും അവന്റെ ഒപ്പമുണ്ടാകും. ലാഘവത്തോടെയുള്ള ജീവിതം നയിച്ച് ഇന്ന് ഭാരതത്തിന്റെ പ്രധാനമന്ത്രി പദത്തിലെത്തിയ നരേന്ദ്ര ഭായിയ്‌ക്ക് എന്റെ സല്യൂട്ട്. അനുജന്മാരായ പ്രഹ്ലാദ് ഭായിയ്‌ക്കും, പങ്കജ് ഭായിയ്‌ക്കും എന്റെ ആശംസകൾ. എന്റെ പ്രാർത്ഥനകളിൽ എന്നും നിങ്ങൾ എല്ലാവരും ഉണ്ടാവും. ആദ്യമായാണ് ഞാൻ ഗുജറാത്തി ഭാഷയിൽ എഴുതുന്നത്. തെറ്റുകൾ ഉണ്ടാവും ക്ഷമിക്കുക’ എന്നാണ് ലതാ മങ്കേഷ്‌കർ എഴുതിയത്.
ഇന്നലെ രാവിലെയാണ് ലതാ മങ്കേഷ്‌കർ അന്തരിച്ചത്. ഗാനകോകിലത്തിന് അന്തിമോപചാരമർപ്പിക്കാൻ പ്രധാനമന്ത്രി മുംബൈയിൽ എത്തിയിരുന്നു. നിരവധി സിനിമാ താരങ്ങളും, രാഷ്‌ട്രീയ പ്രമുഖരും ലത മങ്കേഷ്‌കറിന് അന്തിമോപചാരമർപ്പിക്കാൻ ശിവാജി പാർക്കിൽ എത്തിയിരുന്നു.
