ഹൈദരാബാദ് : ബിജെപി സർക്കാരിനെ അധികാരത്തിൽ നിന്നും താഴെയിറക്കുമെന്ന് വീരവാദം മുഴക്കി തെലങ്കാന മുഖ്യമന്ത്രി ചന്ദ്രശേഖര റാവു. ബിജെപി സർക്കാർ ജനങ്ങൾക്ക് വേണ്ടി ഒന്നും ചെയ്യുന്നില്ലെന്നും പിന്തുണ ലഭിച്ചില്ലെങ്കിൽ മോദി സർക്കാരിനെ വേട്ടയാടി താഴെയിറക്കുമെന്നുമാണ് മുഖ്യമന്ത്രി പറഞ്ഞത്. നരേന്ദ്ര മോദി ജാഗ്രത പാലിക്കണമെന്നും തെലങ്കാന രാഷ്‌ട്ര സമിതി നേതാവ് പറഞ്ഞു.
‘നിങ്ങൾ ഞങ്ങൾക്ക് മെഡിക്കൽ കോളേജുകൾ തന്നില്ല, ദേശീയ പദ്ധതികൾ ഒന്നും തന്നെ നടപ്പിലാക്കുന്നുമില്ല. കേന്ദ്രത്തിന്റെ പിന്തുണ ലഭിച്ചില്ലെങ്കിൽ ഞങ്ങൾക്ക് പ്രശ്‌നമില്ല, എന്നാലും മോദിയെ അധികാരത്തിൽ നിന്നും താഴെയിറക്കും. ഞങ്ങൾ രാജ്യത്തിന് വേണ്ടി പോരാടും. ജനങ്ങൾ കൂടെയുണ്ടെങ്കിൽ ഡൽഹിയിലെ കോട്ട തകർക്കാനും ഞാൻ മടിക്കില്ല’ ചന്ദ്രശേഖര റാവു വ്യക്തമാക്കി. നരേന്ദ്ര മോദി ജാഗ്രത പുലർത്തണമെന്നാണ് മുഖ്യമന്ത്രി ഭീഷണി സ്വരത്തിൽ പറഞ്ഞത്.
ഹൈദരാബാദിലെ സമത്വ പ്രതിമ ഉദ്ഘാടനം ചെയ്യാൻ കഴിഞ്ഞയാഴ്ച പ്രധാനമന്ത്രി തെലങ്കാനയിൽ എത്തിയിരുന്നു. എന്നാൽ അദ്ദേഹത്തെ സ്വീകരിക്കാൻ ചന്ദ്രശേഖര റാവു വന്നില്ല. രാമാനുജാചാര്യയുടെ സമത്വ പ്രതിമ അനാച്ഛാദന ചടങ്ങിലും തെലങ്കാന മുഖ്യമന്ത്രി പങ്കെടുത്തിരുന്നില്ല. ഇതിനെതിരെ വ്യപാക വിമർശനം ഉയർന്നിരുന്നു.
