പ്രണവ് മോഹൻലാലിനെ നായകനാക്കി വിനീത് ശ്രീനിവാസൻ ഒരുക്കിയ ഹൃദയത്തിന് വലിയ സ്വീകാര്യതയാണ് ലഭിച്ചത്. തീയേറ്ററിൽ 25 ദിവസം പൂർത്തിയാക്കിയ ഹൃദയം ഇപ്പോഴും നിറഞ്ഞ സദസ്സിൽ പ്രദർശനം തുടരുകയാണ്. ചിത്രം ആഗോള ഗ്രോസ് കളക്ഷനിൽ 50 കോടി കളക്ഷൻ നേടിയെന്ന വിവരമുണ്ടെങ്കിലും ഇക്കാര്യം നിർമ്മാതാക്കൾ ഔദ്യോഗികമായി സ്ഥിരീകരിച്ചിട്ടില്ല. ചിത്രത്തിന്റെ ഒടിടി റിലീസ് തീയതിയും പ്രഖ്യാപിച്ചിട്ടുണ്ട്. ഫെബ്രുവരി 18ന് ചിത്രം ഹോട്ട്സ്റ്റാറിലെത്തും.
ഇക്കഴിഞ്ഞ ജനുവരി 21നാണ് ചിത്രം തീയേറ്ററിൽ എത്തിയത്. അഞ്ച് വർഷത്തെ ഇടവേളയ്ക്ക് ശേഷം വിനീത് ശ്രീനിവാസന്റെ സംവിധാനത്തിൽ എത്തിയ ചിത്രമാണ് ഹൃദയം. പ്രണവിന് പുറമെ കല്യാണി പ്രിയദർശൻ, ദർശന തുടങ്ങിയവരാണ് ചിത്രത്തിൽ പ്രധാന വേഷങ്ങളായി എത്തിയത്. അതേസമയം ചിത്രം നിറഞ്ഞ സദസ്സിൽ പ്രദർശനം തുടരുമ്പോഴും പ്രണവിനെ തിരയുകയാണ് ആരാധകർ. സോഷ്യൽ മീഡിയ പോസ്റ്റുകളിലെല്ലാം പ്രണവ് മോഹൻലാലിനെ അന്വേഷിച്ചുള്ള കമന്റുകളാണ്.
കൊറോണ മൂന്നാം തരംഗത്തിന്റേയും ഞായറാഴ്ച്ച ലോക്ഡൗണിന്റേയും പശ്ചാത്തലത്തിൽ മികച്ച നേട്ടമാണ് ചിത്രം ഉണ്ടാക്കിയത്. ചെന്നൈ മുഖ്യ ലൊക്കേഷനായ ചിത്രം തമിഴ് പ്രേക്ഷകരേയും ആകർഷിച്ചിരുന്നു. ഹിഷാം അബ്ദുൾ വഹാബ് ഈണം നൽകിയ 15 ഗാനങ്ങൾ ചിത്രത്തിലുണ്ട്. മെറിലാൻഡ് സിനിമാസിന്റെ ബാനറിൽ വിശാഖ് സുബ്രഹ്മണ്യമായിരുന്നു നിർമ്മാണം.
Comments