ന്യൂഡൽഹി: മുൻ കേന്ദ്ര നിയമമന്ത്രിയും മുതിർന്ന കോൺഗ്രസ് നേതാവുമായ അശ്വനി കുമാർ പാർട്ടിയിൽ നിന്നും രാജിവെച്ചു. കോൺഗ്രസുമായുള്ള നീണ്ട 46 വർഷത്തെ ബന്ധത്തിനൊടുവിലാണ് രാജി.
കോൺഗ്രസ് ഇടക്കാല അദ്ധ്യക്ഷ സോണിയ ഗാന്ധിക്ക് അദ്ദേഹം രാജിക്കത്ത് കൈമാറി. ഈ വിഷയത്തിൽ താൻ ഒരുപാട് ചിന്തിച്ചതായും സമകാലിക സാഹചര്യങ്ങൾ കണക്കിലെടുത്താണ് നടപടിയെന്നും രാജിക്കത്തിൽ അദ്ദേഹം പറയുന്നു.
കോൺഗ്രസിന് പുറത്ത് നിന്നും രാജ്യത്തിന് വേണ്ടി തനിക്ക് കൂടുതൽ പ്രവർത്തിക്കാൻ കഴിയുമെന്നാണ് പ്രതീക്ഷിക്കുന്നതെന്നും മുൻകാലങ്ങളിൽ പാർട്ടി തനിക്ക് നൽകിയ പരിഗണനയ്ക്ക് നന്ദിയുണ്ടെന്നും അശ്വിനി കുമാർ വ്യക്തമാക്കി.
പഞ്ചാബിൽ നിന്നുള്ള മുൻ രാജ്യസഭാംഗം കൂടിയായ അശ്വിനി കുമാറിന്റെ രാജി, സംസ്ഥാനത്ത് തെരഞ്ഞെടുപ്പ് നടക്കുന്ന വേളയിൽ കോൺഗ്രസിന് വൻ തിരിച്ചടിയാവുകയാണ്.
