ശബരിമല: ശബരിമലയില് യുവതി പ്രവേശനം നടന്നെന്ന് വ്യാജപ്രചാരണം. ചിരഞ്ജീവിയോടൊപ്പം ശബരിമലയില് എത്തിയ മധുമതി ചുക്കാപ്പള്ളിയെ കണ്ടാല് യുവതിയായി തോന്നിക്കുന്നതാണ് പ്രചാരണത്തിന് കാരണം. എന്നാല് യഥാര്ത്ഥത്തില് ഇവര്ക്ക് 55 വയസ്സ് പ്രായമുണ്ട്. 1966 ജൂലൈ 26 ആണ് ഇവരുടെ ജനന തിയതി. ഹൈദരാബാദ് ആസ്ഥാനമായ ഫീനിക്സ് ഗ്രൂപ്പ് ചെയര്മാന് സുരേഷ് ചുക്കാപ്പള്ളിയുടെ ഭാര്യയാണ് മധുമതി. ഫീനിക്സ് ഗ്രൂപ്പ് ഡയറക്ടര് കൂടിയാണ് മധുമതി. ചിരഞ്ജീവി, ഭാര്യ സുരേഖ, സുരേഷ് ചുക്കാപ്പള്ളി, മധുമതി ചുക്കാപ്പള്ളി എന്നിവരാണ് 13ന് രാവിലെ ശബരിമല ദര്ശനം നടത്തിയത്.
വിഷയത്തില് സുരേഷിന്റേയും മധുമതിയുടേയും മകന് ചുക്കാപ്പള്ളി അവിനാശും വിശദീകരണവുമായി രംഗത്തെത്തിയിട്ടുണ്ട്. ‘എന്റെ അമ്മയെപ്പറ്റിയാണ് ആരോപണങ്ങള് ഉയരുന്നത്. 1966ലാണ് അമ്മയുടെ ജനനം. 2017ല് ശബരിമലക്ഷേത്രത്തിലേക്ക് കൊടിമരം സംഭാവന ചെയ്തിരിക്കുന്നതും ഞങ്ങളാണ്. എനിക്ക് 34 വയസ്സായെന്നും’ ഇദ്ദേഹത്തിന്റെ കുറിപ്പില് പറയുന്നു.
ഗുരുവായൂര് ക്ഷേത്രത്തിലും കഴിഞ്ഞ ദിവസം ചിരഞ്ജീവിയും സുരേഷ് ചുക്കാപ്പള്ളിയും കുടുംബസമേതം ദര്ശനം നടത്തിയിരുന്നു. കൊച്ചിയില് നിന്ന് ഹെലികോപ്റ്ററില് നിലയ്ക്കലില് എത്തി ശബരിമല ദര്ശനം കഴിഞ്ഞതിന് ശേഷമാണ് ചിരഞ്ജീവി ഗുരുവായൂരില് എത്തിയത്. മുന്പ് 2012ല് ടൂറിസം, സാംസ്കാരികവകുപ്പിലെ കേന്ദ്രമന്ത്രി ആയിരുന്നപ്പോഴും ചിരഞ്ജീവി ക്ഷേത്രത്തില് എത്തിയിരുന്നു.
Comments