കാറിന്റെ നിറം, മോഡൽ, സ്‌റ്റൈൽ എന്നിവയേക്കാൾ സ്വന്തം ജീവൻ രക്ഷിക്കുന്ന എന്തെല്ലാം ഫീച്ചറുകളാണ് താൻ സ്വന്തമാക്കാൻ ആഗ്രഹിക്കുന്ന വാഹനത്തിനുള്ളതെന്നാണ് ഇന്ന് ആളുകൾ തിരയുന്നത്. അതുകൊണ്ട് തന്നെ ഉപഭോക്താക്കൾക്കായി മികച്ച സുരക്ഷ ഉറപ്പാക്കുന്ന വാഹനങ്ങൾ അവതരിപ്പിക്കാനാണ് ഓരോ വാഹന നിർമ്മാതാക്കളും ഇപ്പോൾ ശ്രമിച്ചുകൊണ്ടിരിക്കുന്നത്. അടുത്തിടെ ഗ്ലോബൽ എൻസിഎപി നടത്തിയ ക്രാഷ് ടെസ്റ്റിൽ ഇന്ത്യൻ വാഹന വിപണിയിലെ രണ്ട് വമ്പന്മാരുടെ വാഹനം നേടിയ മാർക്ക് ഇതിന് ഉത്തമ ഉദാഹരണമാണ്.
റെനോ കിഗറും, നിസാൻ മാഗ്‌നൈറ്റുമാണ് അടുത്തിടെ ക്രാഷ് ടെസ്റ്റിൽ പങ്കെടുത്ത രണ്ട് സബ്-കോംപാക്ട് എസ് യുവികൾ. ഗ്ലോബൽ എൻസിഎപിയുടെ ക്രാഷ് ടെസ്റ്റിൽ ഇരു വാഹനങ്ങളും 4-സ്റ്റാർ റേറ്റിംഗ് നേടി പാസായി. എന്നാൽ കുട്ടികളുടെ സുരക്ഷയുടെ കാര്യത്തിൽ കിഗറിനും മാഗ്‌നൈറ്റിനും നിരാശയായിരുന്നു ഫലം. 2-സ്റ്റാർ റേറ്റിംഗ് മാത്രമാണ് രണ്ട് വാഹനങ്ങളും കുട്ടികളുടെ സുരക്ഷയ്‌ക്ക് നേടിയത്.
റെനോ കുടുംബത്തിൽ നിന്നും ക്രാഷ് ടെസ്റ്റിൽ മികച്ച പ്രകടനം കാഴ്ച വെയ്‌ക്കുന്ന രണ്ടാമത്തെ വാഹനമാണ് കിഗർ. ഇതിന് മുൻപ് ട്രിബറും 4-സ്റ്റാർ റേറ്റിംഗ് നേടിയിരുന്നു. കിഗറിന്റെ അടിസ്ഥാന വെരിയന്റാണ് ടെസ്റ്റിനായി ഉപയോഗിച്ചത്.
ഇത്തിൽ രണ്ട് എയർബാഗുകളും, എബിഎസും ലഭ്യമാണ്. മുതിർന്നവരുടെ സുരക്ഷയിൽ 17ൽ 12.34 സ്‌കോറാണ് ക്രാഷ് ടെസ്റ്റിൽ കിഗർ സ്വന്തമാക്കിയത്. എന്നാൽ കുട്ടികളുടെ സുരക്ഷയിൽ 49ൽ 21.05 സ്‌കോർ മാത്രമാണ് കിഗറിന് ലഭിച്ചത്. ഡ്രൈവറുടെയും, മുന്നിൽ ഇരിക്കുന്ന യാത്രക്കാരന്റെയും തലയ്‌ക്കും കഴുത്തിനും മികച്ച സുരക്ഷയാണ് കിഗർ നൽകുന്നത് എന്ന് ക്രാഷ് ടെസ്റ്റിൽ തെളിഞ്ഞിട്ടുണ്ട്.
അതേസമയം, മുതിർന്നവരുടെ സുരക്ഷയിൽ 17ൽ 11.85 പോയന്റ് നേടിയാണ് നിസാൻ മാഗ്‌നൈറ്റ് ക്രാഷ് ടെസ്റ്റിൽ കരുത്ത് തെളിയിച്ചത്. കുട്ടികളുടെ സുരക്ഷയിൽ 49ൽ 24.88 സ്‌കോറാണ് മാഗ്‌നൈറ്റ് കരസ്ഥമാക്കിയത്. ഡ്രൈവറുടെയും മുന്നിൽ ഇരിക്കുന്ന യാത്രക്കാരന്റെയും തലയ്‌ക്കും കഴുത്തിനും മികച്ച സുരക്ഷ വാഹനം നൽകുന്നുണ്ട്. എന്നാൽ ഇവരുടെ നെഞ്ചിന് താരതമ്യേന സുരക്ഷ കുറവാണെന്നും ടെസ്റ്റിൽ തെളിഞ്ഞു.
