അന്തരിച്ച നടന് കോട്ടയം പ്രദീപിനെ അനുസ്മരിച്ച് സംവിധായകന് ബി.ഉണ്ണികൃഷ്ണന്. നാളെ റിലീസ് ചെയ്യാനിരിക്കുന്ന ആറാട്ട് സിനിമയില് പ്രദീപും അഭിനയിച്ചിരുന്നു. ഉണ്ണികൃഷ്ണന്റെ സംവിധാനത്തിലൊരുങ്ങുന്ന ചിത്രമാണ് ആറാട്ട്. ഇതില് മോഹന്ലാലും പ്രദീപും തമ്മിലുള്ള കോമ്പിനേഷന് സീനുകള് രസകരമായിരുന്നുവെന്ന് ഉണ്ണികൃഷ്ണന് പറയുന്നു. രണ്ട് ദിവസം മുന്പും ആറാട്ടിന്റെ റിലീസ് വിശേഷങ്ങള് പ്രദീപ് വിളിച്ചു ചോദിച്ചിരുന്നുവെന്നും ഉണ്ണികൃഷ്ണന് പറയുന്നു.
‘ പ്രദീപിന്റെ വിയോഗം വിശ്വസിക്കാനാവുന്നില്ല. രണ്ട് ദിവസങ്ങള്ക്ക് മുമ്പും, ‘ആറാട്ടി’ന്റെ റിലിസ് വിശേഷങ്ങള് വിളിച്ച് ചോദിച്ചിരുന്നു. ജി സി സി റിലിസുമായി ബന്ധപ്പെട്ട് പ്രമോഷനല് വീഡിയോ അയച്ച് തന്നിരുന്നു. ഇന്ന് പുലര്ച്ചെ കേട്ടത് അതീവ ദുഖകരമായ ആ വാര്ത്തയാണ്. ‘ നെയ്യാറ്റിന്കര ഗോപന്റെ ആറാട്ടി’ല് പ്രദീപും ലാല്സാറും തമ്മിലുള്ള കോമ്പിനേഷന് സീന് രസകരമായിരുന്നു. സിനിമയില്, പ്രദീപിന്റെ കഥാപാത്രം മറ്റൊരാളെപ്പറ്റി പറയുന്നുണ്ട്, ‘ കഴിവുള്ള കലാകാരനായിരുന്നു’യെന്ന്. അതെ, പ്രദീപും അങ്ങിനെ തന്നെ. തികഞ്ഞ സഹൃദയന്, സംഗീതപ്രേമി. ‘ആറാട്ടി’ല് ഒപ്പമുണ്ടായിരുന്നവരില് നെടുമുടി വേണുച്ചേട്ടനും, എന്റെ ചീഫ് അസ്സോസിയേറ്റ് ജയനും പിറകെ, ദാ, ഇപ്പൊ പ്രദീപും. ആദരാഞ്ജലികള്’
ഇന്ന് പുലര്ച്ചെ ഹൃദയാഘാതത്തെ തുടര്ന്നായിരുന്നു കോട്ടയം പ്രദീപിന്റെ അന്ത്യം. അദ്ദേഹം അവസാനമായി അഭിനയിച്ച ചിത്രം കൂടിയാണ് ആറാട്ട്.
