ദുബായ് : യു.എ.ഇ. സായുധ സേനയുടെ തത്സമയ പരേഡിന് എക്സ്പോ 2020 വേദിയാകും. മാർച്ചിൽ നടക്കുന്ന പരേഡിന് മുന്നോടിയായി സമഗ്രമായ സജ്ജീകരണങ്ങളാണ് പ്രതിരോധമന്ത്രാലയത്തിന്റെ നേതൃത്വത്തിൽ നടക്കുന്നത്.യു.എ.ഇ. വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂമിന്റെ രക്ഷാകർത്തൃത്വത്തിലാണ് പരേഡ് ഒരുങ്ങുന്നത്.
രാജ്യത്തിന്റെയും ജനതയുടെയും സുരക്ഷയുറപ്പാക്കുന്നതിൽ സേനയുടെ പങ്ക് വ്യക്തമാക്കും വിധത്തിലുള്ള അവതരണങ്ങളാണ് നടക്കുക. സേനയുടെ വാഹനങ്ങളും ആയുധങ്ങൾ അടക്കമുള്ള നൂതന സംവിധാനങ്ങളും ഇതിൽ അണിനിരത്തും. സേനയുടെ വിവിധ വിഭാഗങ്ങളുടെ പ്രകടനങ്ങളും പരേഡിന്റെ ഭാഗമാകും. പൊതുജനങ്ങൾക്കും കാണാവുന്ന രീതിയിലാണ് പരേഡ് സജ്ജീകരിക്കുന്നത്.
