ലോകത്തെ ഏറ്റവും വലിയ പണക്കാരനാരാണെന്ന് ചോദിച്ചാൽ ഒരേ ഒരു ഉത്തരമേ ഉള്ളൂ. ടെസ്ലയുടെ എല്ലാമെല്ലാമായ ഇലോൺ മസ്ക്. 24,930 കോടി യുഎസ് ഡോളർ ആസ്തിയുള്ള ഇലോൺ മസ്ക് ലോകത്തെ മറ്റുള്ള അതി സമ്പന്നരേക്കാൾ ബഹുദൂരം മുമ്പിലാണെന്ന് പറയാം.
എന്നാൽ ലോകത്തെ ഞെട്ടിച്ച് കൊണ്ട് പെട്ടെന്ന് ഒരാൾ മസ്കിന്റെ ഒന്നാം സ്ഥാനം തട്ടിയെടുത്തു. രണ്ടാം സ്ഥാനത്ത് നിൽക്കുന്ന ആമസോൺ സ്ഥാപകൻ ജെഫ് ബെസോസ് അല്ല ആ സ്ഥാനം തട്ടിയെടുത്തത്.മറിച്ച് ഒരു യൂട്യൂബർ ആണ്. ആരാണാ ‘കിടുക്കാച്ചി’ യൂട്യൂബർ എന്നല്ലേ യുകെ സ്വദേശിയായ മാക്സ് ഫോഷ് എന്ന ഇരുപത്തിയാറുകാരനാണ്. എന്നാൽ വെറും ഏഴ് മിനിറ്റ് നേരത്തേക്കാണ് മാക്സ് ഫോഷ് ലോകത്തെ അതിസമ്പന്നനായത്. എങ്ങനെയാണ് മാക്സ് ഫോഷ് ഏഴ്മിനിറ്റ് നേരത്തേക്ക് ലോകത്തെ അതി സമ്പന്നനായതെന്നല്ലേ?
നമ്മുടെ കേരളത്തെപോലെയല്ല. യുകെയിൽ ഒരു കമ്പനി എളുപ്പത്തിൽ ആരംഭിക്കാനാവും. കമ്പനി ആരംഭിക്കുവാനായി ഒരു ഫോം ഫിൽ ചെയ്യേണ്ടതുണ്ട്. ഇതിൽ കമ്പനിയുടെ പേരും മറ്റ് വിശദാംശങ്ങളും രേഖപ്പെടുത്തേണ്ടതുണ്ട്. ഫോമിൽ അൺലിമിറ്റഡ് മണി ലിമിറ്റഡ് എന്നാണ് കമ്പനിയുടെ പേര് രേഖപ്പെടുത്തിയത്. മാക്റോണി,ന്യൂഡിൽസ്,കസ്കസ് തുടങ്ങിയവ ഉത്പാദിപ്പിക്കുന്ന കമ്പനിയാണ് തന്റേതെന്നും മാക്സ് ഫോഷ് രേഖപ്പെടുത്തി. പത്ത് ബില്യൺ ഓഹരികളും ഈ വിരുതൻ കമ്പനിയുടെ പേരിൽ രേഖപ്പെടുത്തുകയുണ്ടായി.ഒരു ഓഹരിക്ക് 50 പൗണ്ട് എന്ന തോതിൽ വിലയും ഇട്ടു. ഇതോടെ കമ്പനിയുടെ മൂല്യം 500 ബില്യൺ ഡോളറായെന്ന് മാക്സ് പറയുന്നു.
ഇങ്ങനയാണത്രേ മാക്സ് ലോകത്തിലെ ഏറ്റവും വലിയ പണക്കാരനായി മാറിയത്.എന്നാൽ കാര്യമിങ്ങനെ ഒക്കെയാണെങ്കിലും കമ്പനിക്ക് നിക്ഷേപം കണ്ടെത്തുക പ്രയാസകരമായിരുന്നു. ഇതിനായി മാക്സ് രണ്ട് കസേരയും മേശയും വെച്ച് ലണ്ടനിലെ തെരുവിൽ ഓഹരിക്കച്ചവടം തുടങ്ങി.കുറച്ച് പേർ ഓഹരികൾ വാങ്ങിക്കുകയും ചെയ്തു.
അല്പ സമയത്തിന് ശേഷം താൻ പെട്ടിരിക്കുന്നത് വലിയ കുരുക്കിലാണെന്ന് മാക്സിന് മനസിലായി. മാക്സിന്റെ കമ്പനിക്ക് നേരെ തട്ടിപ്പ് ആരോപണം ഉയർന്നു. യുകെയിലെ വാണിജ്യ മന്ത്രാലയത്തിന്റെ ഭാഗത്ത് നിന്നായിരുന്നു ഇടപെടൽ. അൺലിമിറ്റഡ് മണി ലിമിറ്റഡ് എന്ന കമ്പനിയുടെ വിപണി മൂല്യം 500 ബില്യൺ പൗണ്ടാണെന്ന് രേഖകളിൽ നിന്ന് വ്യക്തമാണെന്നും എന്നാൽ വരുമാനത്തിനായുള്ള പ്രവർത്തനമൊന്നും കമ്പനി നടത്താത്തതിനാൽ ഇതൊരു തട്ടിപ്പാണെന്ന് കരുതുന്നതായും അധികൃതർ മാക്സ് ഫോഷിന് അയച്ച സന്ദേശത്തിൽ വ്യക്തമാക്കി.
അതിനാൽ എത്രയും വേഗം കമ്പനി പിരിച്ചുവിടണമെന്നും അവർ സന്ദേശത്തിൽ ആവശ്യപ്പെട്ടിരുന്നു. അധികൃതരുടെ നിർദ്ദേശം മാക്സ് കണ്ണും പൂട്ടി അനുസരിച്ചു.അതിന് പിന്നാലെ ഏഴ് മിനിറ്റ് നേരത്തേക്ക് താൻ ലോകത്തിലെ ഏറ്റവും ധനികനായെന്ന് അവകാശപ്പെട്ട് മാക്സ് ഫോഷ് യൂട്യൂബിൽ വീഡിയോ പങ്കുവെക്കുകയും ചെയ്തു. ലക്ഷക്കണക്കിന് ആളുകളാണ് മാക്സ് ഫോഷിന്റെ വീഡിയോ ഇതിനോടകം തന്നെ കണ്ടിട്ടുള്ളത്.
