കശ്മീരിലെ പണ്ഡിറ്റുകളെ വംശഹത്യ ചെയ്ത ഇസ്ലാമിക ഭീകരത തുറന്ന് കാട്ടുന്ന വിവേക് അഗ്നിഹോത്രി ചിത്രം ‘ദി കശ്മീരി ഫയൽസ്’ ന്റെ ട്രെയിലർ പുറത്ത്. അനുപം ഖേർ, മിഥുൻ ചക്രബർത്തി എന്നിവർ പ്രധാന വേഷത്തിൽ എത്തുന്ന ബോളിവുഡ് സിനിമ മാർച്ച് 11 നാണ് തിയേറ്ററുകളിൽ എത്തുന്നത്. കശ്മീരി പണ്ഡിറ്റുകളുടെ ജീവിതവും വർഷങ്ങൾക്ക് മുൻപ് സ്വന്തം നാട്ടിൽ നിന്നുകൊണ്ട് അവർ അനുഭവിച്ച വേദനയുമാണ് ചിത്രത്തിലൂടെ പ്രേക്ഷകരിലേക്ക് എത്തിക്കുന്നത്.
കശ്മീരിലെ പണ്ഡിറ്റുകളുടെ യഥാർത്ഥ ജീവിതം ആസ്പദമാക്കി ഇസ്ലാമിക ഭീകരതയുടെ ഞെട്ടിപ്പിക്കുന്ന ദൃശ്യങ്ങൾ തുറന്ന് കാട്ടുന്നതാണ് ചിത്രം. പല്ലവി ജോഷി, പ്രകാശ് ബെലവാടി, ദർശൻ കുമാർ, ചിന്മയി മണ്ഡലേക്കർ മൃണാൽ കുൽക്കർണി, അതുൽ ശ്രീവാസ്തവ എന്നീ പ്രശസ്ത താരങ്ങളും ചിത്രത്തിലുണ്ട്. തേജ് നാരായൺ അഗർവാൾ, അഭിഷേക് അഗർവാൾ, പല്ലവി ജോഷി എന്നിവരാണ് ചിത്രത്തിന്റെ നിർമ്മാതാക്കൾ.
കശ്മീർ വംശഹത്യയുടെ കഥ ബിഗ് സ്ക്രീനിലേക്ക് കൊണ്ടുവരിക എന്നത് അത്ര എളുപ്പമുള്ള കാര്യമല്ല എന്നാണ് സംവിധായകൻ വിവേഹ് അഗ്നിഹോത്രി പറയുന്നത്. സിനിമ റിലീസ് ചെയ്യരുതെന്ന് പറഞ്ഞ് മതമൗലികവാദികൾ സംവിധായകന് നേരെ ഭീഷണി മുഴക്കിയ സംഭവം വരെയുണ്ടായിരുന്നു. റിപ്പബ്ലിക് ദിനത്തിൽ ചിത്രം റിലീസ് ചെയ്യുമെന്നാണ് അറിയിച്ചിരുന്നത്. എന്നാൽ സാങ്കേതിക പ്രശ്നങ്ങൾ കാരണം റിലീസ് മാറ്റിവെക്കുകയായിരുന്നു.
