ശ്രീനാരായണ ഗുരുവിനെ മുൻനിർത്തി യോഗത്തെ മറയാക്കി സ്വന്തം ബിംബം നിർമ്മിക്കുന്ന ഉപജാപക സംഘത്തെ ഓരോ ഈഴവ ഭവനങ്ങളിൽ നിന്നും അടിച്ചിറക്കണമെന്ന് ഗോകുലം ഗോപാലൻ . ശ്രീനാരായണ ധർമ്മപരിപാലന യോഗമെന്നായിരുന്നു എസ്.എൻ.ഡി.പി യുടെ പൂർണ്ണരൂപം. അത് ഗോകുലം ഗോപാലന് മാത്രമല്ല ഓരോ മലയാളിക്കും ഹൃദിസ്ഥവുമായിരുന്നു. എന്നാൽ അഴിമതിയും കൊള്ളയും കുടുംബാധിപത്യവും മുഖമുദ്രയാക്കിയ വെള്ളാപ്പള്ളി നടേശൻ നേതാവായി വന്നത് മുതൽ എസ്.എൻ.ഡി.പി യോഗത്തിന്റെ പൂർണ്ണരൂപം മറ്റൊന്നായി തീർന്നോയെന്ന് തനിക്കറിയില്ലെന്നും ഗോകുലം ഗോപാലന്റെ മറുപടി.
ഗോകുലം ഗോപാലൻ വിശ്വസിക്കാൻ കൊള്ളാത്തവൻ ആണെന്നും , ചതിയൻ ആണെന്നും വെള്ളാപ്പള്ളി കഴിഞ്ഞ ദിവസം ആരോപിച്ചിരുന്നു. ഗോകുലം ഗോപാലന് എസ് എൻ ഡി പി യോഗത്തിന്റെ പൂർണ്ണ രൂപം തെറ്റാതെ പറയാൻ അറിയാമോ എന്നും വെള്ളാപ്പള്ളി പരിഹസിച്ചിരുന്നു . ഫേസ് ബുക്ക് പോസ്റ്റിലൂടെയാണ് വെള്ളാപ്പള്ളിക്ക് ഗോകുലം ഗോപാലൻ മറുപടി നൽകിയത്
സ്വന്തം അഴിമതിയും മോഷണവും കെ.കെ മഹേശനെ പോലെയുള്ള നിരപരാധികളുടെ മേൽ കെട്ടിവെച്ച് അവരെ അത്മഹത്യയിലേക്ക് തള്ളിവിടുന്ന വെള്ളാപ്പള്ളി നടേശനാണ് യഥാർത്ഥ ശകുനി. അത്തരക്കാർ ഗോകുലം ഗോപാലനൊപ്പമില്ലെന്നും അദ്ദേഹം അഭിപ്രായപ്പെടുന്നു .
ശ്രീനാരായണ ഗുരുവിനെ മുൻനിർത്തി യോഗത്തെ മറയാക്കി സ്വന്തം ബിംബം നിർമ്മിക്കുന്ന ഈ ഉപജാപക സംഘത്തെയാണ് ഓരോ ഈഴവ ഭവനങ്ങളിൽ നിന്നും അടിച്ചിറക്കേണ്ടതെന്നും , തൊഴിലും കച്ചവടവും അവസാനിപ്പിച്ച് കേരളത്തിലെ പാവം ശ്രീനാരായണീയരുടെ ചോരയിലും വിയർപ്പിലുമൂറിയ യോഗത്തിന്റെ പണം കൊള്ളയടിച്ച് ഉപജീവനം നടത്തുന്ന വെള്ളാപ്പള്ളിക്ക് മാന്യമായി തൊഴിലെടുത്തു ജീവിക്കുന്നവരോട് പുച്ഛം തോന്നുന്നത് സ്വാഭാവികം മാത്രമാണെന്നും പോസ്റ്റിൽ പറയുന്നു
രാജ്യത്തെ നിയമങ്ങൾ പാലിച്ചും കൃത്യമായി നികുതിയടച്ചും മാത്രമാണ് ഇന്നോളം കച്ചവടം ചെയ്തിട്ടുള്ളത് എന്നത് കൊണ്ട് വെള്ളാപ്പള്ളി നടേശന്റെ വാദങ്ങളെ അതർഹിക്കുന്ന അവജ്ഞയോടെ തള്ളിക്കളയുന്നുവെന്നും ഗോപാലൻ വ്യക്തമാക്കുന്നു
