പണത്തിന് ബുദ്ധിമുട്ട് ഉണ്ടാവുന്ന സമയങ്ങളിൽ മുറ്റത്തൊരു പണം കായ്ക്കുന്ന് മരം ഉണ്ടായിരുന്നുവെങ്കിൽ എന്ന് ചിന്തിക്കാത്തവരായി ആരും തന്നെ കാണില്ല. എന്ത് രസമായിരിക്കും അങ്ങനെ ഒരു മരമുണ്ടായിരുന്നുവെങ്കിൽ അല്ലേ? എന്നാൽ അങ്ങനെ ഒരു മരമുണ്ട്. ഇവിടെ ഒന്നും അല്ല. അങ്ങ് ദൂരെ ദൂരെ യുകെയിലാണ് ഇങ്ങനെ പണമരമുള്ളത്.
യുകെയിലെ നോർത്ത് യോക്കഷെയറിലെ കാടുകളിലാണ് തിങ്ങി നിറഞ്ഞിരിക്കുന്ന നാണയമരങ്ങൾ കാണാൻ സാധിക്കുന്നത്. നല്ല അസ്സൽ നാണയങ്ങളാണ് ഇവിടുത്തെ മരങ്ങളിൽ കാണാൻ സാധിക്കുന്നത്. എന്താണിതിന് കാരണം എന്നല്ലേ? തങ്ങൾ ആരാധിക്കുന്ന ദൈവത്തിനോ ആത്മാവിനോ കാണിക്കയായി മരത്തിൽ നാണയം സമർപ്പിച്ചാൽ എതൊരാഗ്രഹവും സാധിക്കുമെന്നാണ് ഇവിടുത്തുകാരുടെ വിശ്വാസം.
ചുറ്റിക ഉപയോഗിച്ചാണ് മരങ്ങളിലിങ്ങനെ നാണയം പതിപ്പിക്കുന്നത്. ഈ രീതിയിൽ ലക്ഷക്കണക്കിന് നാണയങ്ങൾ പതിപ്പിച്ച നൂറുക്കണക്കിന് മരങ്ങൾ ഈ പ്രദേശത്ത് കാണാൻ സാധിക്കും.ഈ കൂട്ടത്തിൽ സ്കോട്ട്ലൻഡിലെ ഐൽ മാരിയിലെ വിശുദ്ധ മെയ്ൽറൂബയുടെ അവശിഷ്ടങ്ങൾ അടക്കം ചെയ്തിരിക്കുന്ന പ്രദേശത്തുള്ള നാണയമരം ഏറെ പ്രസിദ്ധമാണ്.
1828 കാലഘട്ടത്തിൽ നിർമ്മിച്ച ഒരു നാണയം ഇവിടെ നിന്ന് ലഭിച്ചിട്ടുണ്ട്.കാര്യസിദ്ധിക്കായി 1877ൽ വിക്ടോറിയ രാജ്ഞിയും ഈ മരത്തിൽ നാണയം സമർപ്പിച്ചതായി പറയപ്പെടുന്നു.നാണയങ്ങൾ പതിപ്പിക്കുന്ന മരങ്ങളിൽ പലതും കാലക്രമേണ നശിച്ചു പോയിട്ടുണ്ട്.ഇത്തരത്തിൽ ലോഹങ്ങൾ പതിക്കുന്നത് മരങ്ങൾക്ക് ദോഷമാണ്. നാണയത്തുട്ടുകൾ പതിച്ച് നശിക്കാറായി നിൽക്കുന്ന നിരവധി മരങ്ങൾ ഇന്നും ഈ പ്രദേശങ്ങളിൽ കാണാം. ആഗ്രഹസാഫല്യത്തിനായി ഇന്നും ആളുകൾ മരങ്ങളിൽ നാണയങ്ങൾ പതിപ്പിക്കാറുണ്ട്
