കൊച്ചി; മോഹൻലാലിനെ നായകനാക്കി ബി ഉണ്ണികൃഷ്ണൻ ഒരുക്കിയ മാസ് എന്റർടെയ്നറാണ് ആറാട്ട്. നെയ്യാറ്റിൻകര ഗോപൻ എന്ന കഥാപാത്രത്തിലൂടെ തീയേറ്ററുകൾ ഇളക്കിമറിച്ചിരിക്കുകയാണ് മോഹൻലാൽ എന്ന നടന വിസ്മയം. ഉത്സവപ്രതീതി ഉണർത്തുന്ന രംഗങ്ങൾ കൊണ്ട് സമ്പന്നമായ ചിത്രം പ്രേക്ഷക മനസിൽ ഇടം നേടിക്കഴിഞ്ഞു.
സിനിമ ഇറങ്ങി ആഴ്ചകൾ മാത്രം പിന്നിടുമ്പോൾ ചിത്രത്തിന്റെ സക്സസ് ടീസർ പുറത്തിറക്കിയിരിക്കുകയാണ് മലയാളികളുടെ പ്രിയപ്പെട്ട ലാലേട്ടൻ.ഫേസ്ബുക്കിലൂടെയാണ് നടൻ സക്സ് ടീസർ പങ്കുവെച്ചിരിക്കുന്നത്.
41 സെക്കൻഡ് ദൈർഘ്യമുള്ള ടീസറിൽ മോഹൻലാൽ അവതരിപ്പിക്കുന്ന നെയ്യാറ്റിൻകര ഗോപൻ എന്ന കഥാപാത്രത്തിന്റെ ഇൻട്രോയും ചില മാസ് ഡയലോഗുകളും ആക്ഷനും പാട്ടുമൊക്കെയുണ്ട്. സൈന മൂവീസിന്റെ യുട്യൂബ് ചാനലിലൂടെയാണ് പുതിയ ടീസർ പുറത്തെത്തിയിരിക്കുന്നത്.
ലോകമെമ്പാടുമുള്ള 2700 സ്ക്രീനുകളിലാണ് ആറാട്ട് പ്രദർശനത്തിനെത്തിയത്. കേരളത്തിൽ മാത്രം 522 സ്ക്രീനുകളിലാണ് ചിത്രം പ്രദർശിപ്പിച്ചിരിക്കുന്നത്.
ഒരു പ്രത്യേക ചുമതല നിർവ്വഹിക്കുന്നതിനായി നെയ്യാറ്റിൻകരയിൽ നിന്നും പാലക്കാട്ടെ ഒരു ഗ്രാമത്തിൽ ഗോപൻ എത്തുന്നതും തുടർന്നുള്ള സംഭവങ്ങളുമാണ് ചിത്രത്തിന്റെ പ്രമേയം. 18 കോടി ബഡ്ജറ്റിലാണ് ചിത്രം നിർമ്മിച്ചിരിക്കുന്നത്.പുലിമുരുകന്റെ തിരക്കഥ ഒരുക്കിയ ഉദയ്കൃഷ്ണ തന്നെയാണ് ആറാട്ടിന് പിന്നിലും. ശ്രദ്ധ ശ്രീനാഥ് ആണ് ചിത്രത്തിൽ നായികയായി എത്തുന്നത്.നെടുമുടി വേണു, സായ് കുമാർ, സിദ്ദിഖ്, വിജയരാഘവൻ, ജോണി ആന്റണി, ഇന്ദ്രൻസ്, രാഘവൻ, ഷീല, സ്വാസിക, തുടങ്ങി നിരവധി താരങ്ങൾ ചിത്രത്തിലുണ്ട്.
Comments