പുതിയ മുന്നറിയിപ്പുമായി കേരള പോലീസ്. ഇത്തവണ വൈഫൈ ഉപയോഗത്തെക്കുറിച്ചാണ് പോലീസിന്റെ നിർദേശം..
പബ്ലിക്ക് വൈഫൈ കണ്ടാൽ ചാടിയെടുക്കുന്നവരാണ് മിക്കയാളുകളും. സിനിമ ഡൗൺലോഡ് ചെയ്യാൻ തുടങ്ങി വാട്സാപ്പിൽ ചാറ്റ് ചെയ്യാൻ വരെ പബ്ലിക്ക് വൈഫൈ ഉപയോഗിക്കാറുണ്ട്. ഓൺലൈൻ ഇടപാടുകൾ നടത്തുന്നവരും ചുരുക്കമല്ല. എന്നാൽ പബ്ലിക്ക് വൈഫൈ ഉപയോഗിച്ച് ഓൺലൈൻ ഇടപാടുകൾ നടത്തരുതെന്നാണ് കേരള പോലീസിന്റെ മുന്നറിയിപ്പ്..
മാളുകൾ, എയർപോർട്ടുകൾ, ഹോട്ടലുകൾ, സർവകലാശാലകൾ, മറ്റ് പൊതു സ്ഥലങ്ങളിൽ എന്നിവിടങ്ങളിൽ നിന്നും ലഭിക്കുന്ന വൈഫൈ ഹോട്ട്സ്പോട്ടുകൾ ഉപയോഗിച്ച് ഓൺലൈൻ പണമിടപാടുകൾ നടത്തരുത്. ഒരു വൈഫൈ നെറ്റ്വർക്കിലേക്ക് കണക്റ്റ് ചെയ്ത് വെബ്സൈറ്റുകളിലൂടെയോ മൊബൈൽ ആപ്പുകളിലൂടെയോ വിവരങ്ങൾ കൈമാറുമ്പോൾ മറ്റാരെങ്കിലും അവ കൈക്കലാക്കാൻ സാധ്യതയുണ്ടെന്നും കേരള പോലീസ് ഓർമ്മിപ്പിക്കുന്നു.
സൗജന്യമായി ലഭ്യമാകുന്ന ഹാക്കിംഗ് ഉപകരണങ്ങൾ ഉപയോഗിച്ച് പരിമിതമായ സാങ്കേതിക പരിജ്ഞാനമുള്ളവർക്കും നിങ്ങളുടെ സെഷൻ ഹൈജാക്ക് ചെയ്യാനും നിങ്ങളെപ്പോലെ ലോഗിൻ ചെയ്യാനും കഴിയും. ഇത്തരത്തിൽ വ്യക്തിഗത വിവരങ്ങൾ, സ്വകാര്യ രേഖകൾ, കോൺടാക്റ്റുകൾ, കുടുംബ ഫോട്ടോകൾ, ലോഗിൻ ക്രെഡൻഷ്യലുകൾ എന്നിവ പോലും നഷ്ടപ്പെടാൻ ഇടയുണ്ടെന്നും കേരള പോലീസ് പങ്കുവെച്ച ഫേസ്ബുക്ക് പോസ്റ്റിൽ പറയുന്നു. അതിനാൽ പബ്ലിക്ക് വൈഫൈ കിട്ടിയാൽ ചാടിക്കയറി ഊറ്റിയെടുക്കുന്നവർ ജാഗ്രതൈ, സൂക്ഷിച്ചാൽ ദുഃഖിക്കേണ്ട..
Comments