ബംബോലിം: ഐഎസ്എല്ലിൽ സെമി ഫൈനൽ സാധ്യത നിലനിർത്തി കേരള ബ്ലാസ്റ്റേഴ്സ്. മുംബൈ സിറ്റിയെ ഒന്നിനെതിരെ മൂന്ന് ഗോളിനിന് വീഴ്‌ത്തിയാണ് ബ്ലാസ്റ്റേഴ്സ് വിജയത്തിലേയ്‌ക്ക് കുതിച്ചത്. ആൽവാരോ വാസ്‌ക്വസിന്റെ ഇരട്ടഗോളും, മലയാളി താരം സഹൽ അബ്ദുൾ സമദിന്റെ വണ്ടർ ഗോളുമാണ് ബ്ലാസ്റ്റേഴ്സിന് വിജയം സമ്മാനിച്ചത്.
19-ാംമിനിറ്റിലാണ് സഹൽ ഗോൾ നേടിയത്. 45,60 മിനിറ്റുകളിലാണ് ആൽവാരോ വലകുലുക്കിയത്. 71-ാം മിനിറ്റിൽ ലഭിച്ച പെനാൽറ്റിയിലൂടെയാണ് മുംബൈയ്‌ക്കായി ഡീഗോ മൗറീസ്യോ ആശ്വാസ ഗോൾ നേടിയത്. ഈ കളിയിലെ ജയത്തോടെ 19 മത്സരത്തിൽ നിന്ന് 33 പോയന്റുകളുമായി കേരള ബ്ലാസ്റ്റേഴ്സ് പട്ടികയിൽ നാലാം സ്ഥാനത്താണ്. അതേസമയം, 19 മത്സരങ്ങൾ പിന്നിട്ടപ്പോൾ, 31 പോയന്റുമായി അഞ്ചാം സ്ഥാനത്താണ് മുംബൈ സിറ്റി.
ഗോവക്കെതിരെ മാർച്ച് 6നാണ് അടുത്ത മത്സരം. മാർച്ച് 5ന് മുംബൈ ഹൈദരബാദ് പോരാട്ടത്തിലൂടെ ബ്ലാസ്റ്റേഴ്‌സിന്റെ ഭാവി തീരുമാനിക്കും. ഇരുവരും തമ്മിലുള്ള മത്സരം സമനിലയിൽ അവസാനിച്ചാൽ പോലും കേരള ബ്ലാസ്റ്റേഴ്സിന് സെമി ഫൈനലിലേക്ക് യോഗ്യത നേടാനാവും.
