മൊഹാലി: ശ്രീലങ്കയ്ക്കെതിരായ ടെസ്റ്റ് പരമ്പരയിലെ ആദ്യ മത്സരത്തിലെ ശ്രദ്ധാകേന്ദ്രം ഇന്ത്യയുടെ മുൻ നായകൻ
കോഹ്ലിയാണ്. മൊഹാലിയിൽ എല്ലാ കണ്ണുകളും ഉറ്റുനോക്കുന്നത് സൂപ്പർ താരത്തിന്റെ പ്രകടനമാണ്. കോഹ്ലിയുടെ 100ാമതെ ടെസ്റ്റാണ് ശ്രീലങ്കയ്ക്കെതിരെ അരങ്ങേറുന്നത്. തന്റെ നൂറാമത്തെ ടെസ്റ്റിൽ ആരാധകർക്കായി കോഹ്ലി കാത്തുവച്ചിരിക്കുന്നത് എന്താണെന്ന ആകാംക്ഷയിലാണ് ക്രിക്കറ്റ് ലോകം. രോഹിത്ശർമ്മ ടെസ്റ്റ് ക്യാപ്റ്റൻ ആകുന്ന ആദ്യ പരമ്പരയെന്ന പ്രത്യേകതയും ഇന്ത്യ-ശ്രീലങ്ക മത്സരത്തിനുണ്ട്.
മാർച്ച് 4 മുതൽ മാർച്ച് 8 വരെ മൊഹാലിയിൽ നടക്കുന്ന ഇന്ത്യയും ശ്രീലങ്കയും തമ്മിലുള്ള ആദ്യ ടെസ്റ്റ് മത്സരത്തിൽ കോഹ്ലി ലോക ക്രിക്കറ്റിൽ പുതിയ നാഴികക്കല്ല് പിന്നിടുമെന്നാണ് പ്രതീക്ഷിക്കുന്നത്. ടെസ്റ്റുകളുടെ എണ്ണത്തിൽ സെഞ്ച്വറി തികയ്ക്കാനാവുന്നത് ക്രിക്കറ്റ് താരങ്ങളെ സംബന്ധിച്ചെടുത്തോളം അഭിമാന മുഹൂർത്തമാണ്. ഈ റെക്കോർഡോടെ ഈ നേട്ടം കൈവരിക്കുന്ന 12ാമത്തെ ഇന്ത്യൻ താരമാകും കോഹ്ലി. സച്ചിൻ ടെണ്ടുൽക്കർ, രാഹുൽ ദ്രാവിഡ്, വിവിഎസ് ലക്ഷ്മൺ, അനിൽ കുംബ്ലെ, സൗരവ് ഗാംഗുലി എന്നിവർ തങ്ങളുടെ കരിയറിൽ 100 ടെസ്റ്റ് മത്സരങ്ങൾ കളിച്ച ചുരുക്കം ചില ഇന്ത്യൻ കളിക്കാരിൽ ഉൾപ്പെടുന്നു.
ഏറ്റവും കൂടുതൽ അന്താരാഷ്ട്ര സെഞ്ച്വറികൾ നേടുന്ന രണ്ടാമത്തെ കളിക്കാരനായി ചരിത്രം സൃഷ്ടിക്കാൻ കോഹ്ലിക്ക് മറ്റൊരു അവസരം കൂടി ലഭിക്കും. നിലവിൽ കോഹ്ലിയുടെ പേരിൽ 70 അന്താരാഷ്ട്ര സെഞ്ചുറികളുണ്ട്, രണ്ടാം റാങ്കിലുള്ള താരത്തേക്കാൾ ഒന്ന് കുറവാണ്. ആദ്യ ടെസ്റ്റിൽ ശ്രീലങ്കയ്ക്കെതിരെ ഒരു സെഞ്ച്വറി നേടിയാൽ, ഏറ്റവും കൂടുതൽ സെഞ്ചുറികൾ നേടുന്ന രണ്ടാമത്തെ കളിക്കാരനായി കോഹ്ലി ഇതിഹാസതാരം റിക്കി പോണ്ടിംഗിനെ മറികടക്കും. 100 സെഞ്ചുറികൾ തന്റെ പേരിലാക്കിയ സച്ചിൻ ടെണ്ടുൽക്കറിന് പിന്നിൽ കോഹ്ലി രണ്ടാമതാകും.
ശ്രീലങ്കയ്ക്കെതിരായ ആദ്യ ടെസ്റ്റിൽ 38 റൺസ് കൂടി നേടിയാൽ ടെസ്റ്റ് ക്രിക്കറ്റിൽ 8000 റൺസ് തികയ്ക്കുന്ന ആറാമത്തെ ഇന്ത്യൻ ബാറ്ററായി കോഹ്ലി മാറും. ആദ്യ ടെസ്റ്റിൽ ഈ നേട്ടം കൈവരിച്ചാൽ സുനിൽ ഗവാസ്കർ, സച്ചിൻ ടെണ്ടുൽക്കർ, രാഹുൽ ദ്രാവിഡ്, വിവിഎസ് ലക്ഷ്മൺ, വീരേന്ദർ സെവാഗ് തുടങ്ങിയവരുടെ പട്ടികയിൽ കോഹ്ലിയും ഉൾപ്പെടും.
മൊഹാലിയിൽ 61 റൺസ് കൂടി നേടിയാൽ, ശ്രീലങ്കയ്ക്കെതിരെ ടെസ്റ്റിൽ ഏറ്റവും കൂടുതൽ റൺസ് നേടുന്ന രണ്ടാമത്തെ ഇന്ത്യൻ ബാറ്ററായി കോഹ്ലി മാറും. മുൻ ഇന്ത്യൻ ക്യാപ്റ്റൻ സൗരവ് ഗാംഗുലിയെയാണ് കോഹ്ലി പട്ടികയിൽ മറികടക്കുക. ദ്വീപ് രാഷ്ട്രത്തിനെതിരെ 25 ടെസ്റ്റ് മത്സരങ്ങളിൽ നിന്ന് 1995 റൺസുമായി സച്ചിൻ ടെണ്ടുൽക്കർ നിലവിൽ ഒന്നാമതാണ്.
ഇന്ത്യയും ശ്രീലങ്കയും തമ്മിൽ ഏറ്റുമുട്ടുന്ന പരമ്പരയിൽ ആകെ രണ്ട് മത്സരങ്ങളാണുളളത്. കഴിഞ്ഞ മാസം അവസാനം ഇതേ ടീമിനെതിരെ കളിച്ച മൂന്ന് മത്സരങ്ങളുടെ ടി20 പരമ്പര ഇന്ത്യ സ്വന്തമാക്കിയിരുന്നു. ടെസ്റ്റിലും ജയിച്ച് പരമ്പര തൂത്തുവാരാനുളള തയ്യാറെടുപ്പിലാണ് ഇന്ത്യ.
Comments