പൗണ്ട് കണക്കിന് ഭാരം ഇരു കൈകളും കൊണ്ട് അനായാസം എടുത്തുയർത്തുന്ന ദൃഢമായ പേശികളുള്ള ശരീരത്തിന് ഉടമ. ആരാധകർക്കിടയിൽ അദ്ദേഹത്തിന്റെ പേര് ലിവർ കിംഗ് എന്നാണ്. ഷർട്ടിടാതെ ഇൻസ്റ്റഗ്രാം വീഡിയോകളിൽ പ്രത്യക്ഷപ്പെടുന്ന ലിവർ കിംഗിന്റെ ജീവിത രീതിയും സന്ദേശങ്ങളും ഇതിനോടകം തന്നെ യുവ തലമുറ ഏറ്റെടുത്ത് കഴിഞ്ഞു. ശരീരം കൊണ്ടും, ആശയങ്ങൾ കൊണ്ടും ചെറുപ്പക്കാരുടെ മനസ്സിൽ ഇടം നേടിയ ലിവർ കിംഗിന്റെ ജീവിതം ഏവരെയും ഞെട്ടിക്കുന്നതാണ്.
കാടിനുള്ളിലെ രണ്ട് നിലകളുള്ള മണിമാളികയിലാണ് ലിവർ കിംഗ് എന്ന് അറിയപ്പെടുന്ന ബ്രയാൻ ജോൺസണിന്റെ താമസം. കൂട്ടിന് ഭാര്യയും, ആഡംബര വാഹനങ്ങളും. എന്തിരുന്നാലും തീർത്തും വന്യമായ ജീവിതം നയിച്ചുവരുന്ന ആരാധകരുടെ സ്വന്തം ലിവർ കിംഗ് ഈ ജീവിത രീതിയിലൂടെ എങ്ങിനെ ആരോഗ്യ നേടാം എന്ന് നമുക്ക് പറഞ്ഞു തരുന്നു.
ഇൻസ്റ്റഗ്രാം വീഡിയോകളിലൂടെയാണ് ലിവർ കിംഗിനെ ആരാധകർ അറിഞ്ഞു തുടങ്ങിയത്. വർക്ക് ഔട്ട് ചെയ്യുന്നതിന്റെ വീഡിയോകൾ പങ്കുവെച്ച് ശ്രദ്ധ പിടിച്ചുപറ്റിയ ബ്രയാൻ പിന്നീട് സ്വന്തം ബലഹീനതകൾ മനസിലാക്കാനും , എപ്പോഴും നമ്മൾ ഭയപ്പെടുന്ന എന്തെങ്കിലുമൊക്കെ ചെയ്യാനും പ്രോത്സാഹിപ്പിച്ചതിലൂടെ ആരാധകരുടെ പ്രിയങ്കരനായി മാറി. വ്യായാമത്തിലൂടെയും ജീവിതശൈലിയിലൂടെയും ജീവിതത്തിലെ മോശം ഘട്ടങ്ങളെ ചെറുക്കാനും അദ്ദേഹം ആളുകളെ പഠിപ്പിച്ചു. ഇൻസ്റ്റഗ്രാം എന്താണ് അറിവില്ലാതിരുന്ന ലിവർ കിംഗിന് ഇന്ന് ഇൻസ്റ്റഗ്രാമിൽ ഒരു ദശലക്ഷത്തിലധികം ഫോളോവേഴ്സ് ആണ് അദ്ദേഹത്തിന് ഉള്ളത്.
44 വയസ്സുള്ള ലിവർ കിംഗ് അമേരിക്കയിലെ ടെക്സാസ് സ്വദേശിയാണ്. ശരീരം കണ്ടാൽ ഭക്ഷണ പ്രേമിയാണെന്ന് തോന്നുമെങ്കിലും സസ്യാഹാരമാണ് അദ്ദേഹം പിന്തുടരുന്നത്. എങ്കിലും മൃഗങ്ങളുടെ കരൾ ഉപ്പ് പുരട്ടി പാകം ചെയ്യാതെ കഴിക്കാനും അദ്ദേഹം ഇഷ്ടപ്പെടുന്നു.
മണിക്കൂറുകൾ വ്യായാമത്തിനായി ചിലവഴിക്കുന്ന അദ്ദേഹത്തിന്റെ വ്യായാമ മുറകൾ ഏറെ കഠിനമാണ്. പൗണ്ട് കണക്കിന് ഭാരം ഉയർത്തിയുള്ള വർക്ക് ഔട്ടും, തല കീഴായി നിന്നുകൊണ്ടുള്ള പുഷ് അപ്പുമെല്ലാം സാധാരണക്കാരെ ഞെട്ടിക്കുന്നതാണ്. നദിക്കുള്ളിലും അദ്ദേഹം വ്യായാമം ചെയ്യാറുണ്ട്.
വ്യായാമവും, ഇൻസ്റ്റഗ്രാമിൽ വീഡിയോകൾ പോസ്റ്റ് ചെയ്യലും മാത്രമാണ് ബ്രയാന്റെ ജോലി എന്ന് കരുതുന്നവർക്ക് തെറ്റി. അവിടെയും ഈ മനുഷ്യൻ യുവാക്കൾക്ക് അത്ഭുതമാകുന്നു. അമേരിക്കയിലെ പ്രമുഖ കമ്പനിയുടെ സിഇഒ ആണ് ബ്രയാൻ എന്ന ഈ ലിവർ കിംഗ്.
