മോഹൻലാലിനെ നായകനാക്കി വൈശാഖ് സംവിധാനം ചെയ്ത ചിത്രമാണ് പുലിമുരുകൻ. മലയാള സിനിമയിലെ ഏറ്റവും വലിയ ഹിറ്റുകളിൽ ഒന്നായിരുന്നു ചിത്രം. ടോമിച്ചൻ മുളകുപാടം നിർമ്മിച്ച ഈ ചിത്രം ആറ് വർഷം മുൻപാണ് റിലീസ് ചെയ്തത്. മലയാളത്തിൽ ആദ്യമായി നൂറ് കോടി ക്ലബ്ബിൽ ഇടം പിടിച്ച ചിത്രമായിരുന്നു പുലിമുരുകൻ. ഇപ്പോഴിതാ ചിത്രത്തിന്റെ രണ്ടാംഭാഗമവുമായി ബന്ധപ്പെട്ട വാർത്തകളോട് പ്രതികരിച്ചിരിക്കുകയാണ് വൈശാഖ്.
വൈശാഖ് സംവിധാനം ചെയ്യുന്ന പുതിയ ചിത്രം നൈറ്റ് ഡ്രൈവിന്റെ പ്രചാരണ പരിപാടിയ്ക്കിടെയാണ് പുലിമുരുകൻ രണ്ടാം ഭാഗത്തെ കുറിച്ച് പ്രതികരിച്ചത്. മാദ്ധ്യമപ്രവർത്തകന്റെ ചോദ്യത്തിന് ഉത്തരം നൽകുകയായിരുന്നു വൈശാഖ്. പുലി മുരുകൻ രണ്ടാം ഭാഗം എപ്പോൾ വരും എന്ന ചോദ്യത്തിന് നൈറ്റ് ഡ്രൈവ് രണ്ടാം ഭാഗത്തിന് ശേഷം എന്നായിരുന്നു വൈശാഖിന്റെ മറുപടി. ഇത് അവിടെ കൂടിയിരുന്നവരിൽ ചിരി പടർത്തി.
റോഷൻ മാത്യു, അന്ന ബെൻ, ഇന്ദ്രജിത് സുകുമാരൻ എന്നിവരെ കേന്ദ്രകഥാപാത്രമാക്കി വൈശാഖ് ഒരുക്കിയ ചിത്രമാണ് നൈറ്റ് ഡ്രൈവ്. മാർച്ച് പതിനൊന്നിനാണ് ചിത്രം റിലീസ് ചെയ്യുന്നത്. സിദ്ദീഖ്, രഞ്ജി പണിക്കർ, കലാഭവൻ ഷാജോൺ, കൈലാഷ്, മുത്തുമണി തുടങ്ങി വൻ താരനിരയാണ് ചിത്രത്തിലുള്ളത്. ഇത് കൂടാതെ ഉദയ കൃഷ്ണ രചിച്ച് മോഹൻലാൽ നായകനാകുന്ന മോൺസ്റ്റർ എന്ന ചിത്രവും വൈശാഖ് ഒരുക്കിക്കഴിഞ്ഞു. ചിത്രം തീയറ്റർ റിലീസാണെന്നാണ് വിവരം.
