കൊച്ചി: ഇൻക്ഫെക്ടഡ് ടാറ്റൂ സ്റ്റുഡിയോയിലെ ആർട്ടിസ്റ്റ് സുജീഷ് അറസ്റ്റിലായതിന് പിന്നാലെ പ്രതികരണവുമായി ഗായിക അഭിരാമി സുരേഷ്. ഇൻസ്റ്റഗ്രാമിൽ പങ്കുവെച്ച വീഡിയോയിലാണ് താരം പ്രതികരിച്ചത്. തനിക്കും ടാറ്റൂ ചെയ്തത് സുജീഷ് ആണെന്നും അദ്ദേഹത്തിന്റെ മികവ് കണ്ട് പലർക്കും ഇൻക്ഫെക്ടഡ് സ്റ്റുഡിയോ താൻ ശുപാർശ ചെയ്തിട്ടുണ്ടെന്നും അഭിരാമി വെളിപ്പെടുത്തി. തന്റെ കാലിൽ സുജീഷ് ടാറ്റൂ ചെയ്യുന്ന വീഡിയോ താരം അടുത്തിടെ സമൂഹമാദ്ധ്യമങ്ങളിൽ പങ്കുവെച്ചിരുന്നു.
സുജീഷിനെതിരെയുണ്ടായ മീടൂ ആരോപണം വലിയ ഞെട്ടലോടെയാണ് കേട്ടത്. ഇത് വിശ്വസിക്കാൻ കുറച്ച് സമയം വേണ്ടി വന്നു. സുജീഷിൽ നിന്നും ഒരു മോശം അനുഭവം തനിക്കുണ്ടായിട്ടില്ല. വളരെ കാലമായി അറിയാവുന്ന ആളെക്കുറിച്ച് ഇത്തരം മോശമായ വാർത്ത കേൾക്കേണ്ടി വന്നത് ഞെട്ടൽ ഉണ്ടാക്കിയെന്നും അഭിരാമി വീഡിയോയിൽ പറയുന്നു.
സുജീഷിനെതിരെ പരാതി നൽകാൻ ധൈര്യം കാണിച്ച് മുന്നോട്ട് വന്ന യുവതികളെ അഭിരാമി പ്രശംസിച്ചു. മീടൂ ആരോപണം നിസാരമായി കാണരുതെന്നും, ഇത്തരം പരാതികൾ ഒരിക്കലും അവഗണിക്കരുതെന്നും താരം കൂട്ടിച്ചേർത്തു.
ഈ കാലത്ത് പെൺകുട്ടികൾ പെപ്പർസ്പ്രേ കൈയ്യിൽ കരുതേണ്ടത് വളരെ അത്യാവശ്യമാണെന്ന് അഭിരാമി ഓർമ്മിപ്പിച്ചു. ലൈംഗികാതിക്രമം നേരിടേണ്ടി വന്നാൽ ആ സമയത്ത് ചിലപ്പോൾ പ്രതികരിക്കാൻ കഴിഞ്ഞെന്നു വരില്ല. എന്നാൽ ഒരിക്കലും അത് മറച്ചു വയ്ക്കുകയോ നിസാരമായി കാണുകയോ ചെയ്യരുതെന്നും അഭിരാമി വ്യക്തമാക്കി.
Comments