പനാജി: ഗോവയിൽ തിരഞ്ഞെടുപ്പ് ഫലം പ്രഖ്യാപിക്കാൻ മണിക്കൂറുകൾ മാത്രം ബാക്കി നിൽക്കെ റിസോർട്ടുകൾ സജീവമാകുന്നു. കഴിഞ്ഞ തവണത്തേത് പോലുള്ള കൂറുമാറ്റം ഇത്തവണയും പ്രതിപക്ഷ പാർട്ടികൾ പ്രതീക്ഷിക്കുന്നുണ്ട്. അതിനാൽ ബിജെപി ഒഴികെയുള്ള എല്ലാ പാർട്ടികളും അവരുടെ സ്ഥാനാർത്ഥികളെ റിസോർട്ടുകളിൽ പൂട്ടിയിടുന്ന സാഹചര്യമാണ് നിലവിലുള്ളത്.
പുറം ലോകവുമായുള്ള എല്ലാ ബന്ധവും വിച്ഛേദിച്ചിരിക്കുകയാണ്. സ്ഥാനാർത്ഥികളെ മറ്റ് പാർട്ടിയിലേക്ക് കൂറുമാറുന്നത് തടയുന്ന നടപടികളാണ് ബിജെപി ഒഴികെയുള്ള പ്രതിപക്ഷ പാർട്ടികൾ സ്വീകരിച്ചിരിക്കുന്നത്. ബിജെപിയുടെ സ്ഥാനാർത്ഥികൾ മാത്രമാണ് ഇപ്പോൾ പുറത്തുള്ളത്. ഏറ്റവും കൂടുതൽ സീറ്റുകൾ നേടിയിട്ടും ഗോവയിൽ സർക്കാർ രൂപീകരിക്കാൻ കഴിയാതെ പോയ 2017ലെ പരാജയം ആവർത്തിക്കാതിരിക്കാനാണ് കോൺഗ്രസ് ശ്രമിക്കുന്നത്.
തിരഞ്ഞെടുപ്പിലേക്ക് മത്സരിച്ച മുഴുവൻ സ്ഥാനാർത്ഥികളേയും സമീപത്തെ ബാംബോലിം ഗ്രാമത്തിലെ ആഡംബര റിസോർട്ടിലേക്ക് മാറ്റി. വോട്ടെണ്ണൽ കേന്ദ്രം സന്ദർശിക്കാൻ പോലും അനുവദിക്കാതെ പൂട്ടിയിട്ടിരിക്കുകയാണ് ഇവരെ. കോൺഗ്രസിന്റെ ഈ നീക്കത്തെ പരിഹസിച്ച് നിരവധി പേർ രംഗത്തെത്തി. സ്വന്തം സ്ഥാനാർത്ഥികളെ പോലും വിശ്വാസമില്ലാത്ത പാർട്ടിയായി കോൺഗ്രസ് അധ:പതിച്ചിരിക്കുന്നുവെന്ന് ഗോവ മുഖ്യമന്ത്രി പ്രമോദ് സാവന്ത് പരിഹസിച്ചു.
ആർക്കും ഭൂരിപക്ഷമില്ലാതിരുന്ന 2017ൽ കോൺഗ്രസായിരുന്നു ഗോവയിലെ ഏറ്റവും വലിയ ഒറ്റക്കക്ഷി. എന്നാൽ അന്ന് മഹാരാഷ്ട്രവാദി ഗോമന്തക് പാർട്ടി ഉൾപ്പെടെയുള്ള പ്രാദേശിക പാർട്ടികളുടെ പിന്തുണയോടെ ബിജെപി അധികാരത്തിലേറുകയായിരുന്നു.
