ജയസൂര്യ നായകനായെത്തിയ വെള്ളം സിനിമ ഏറെ ചർച്ചയായിരുന്നു. കണ്ണൂർ സ്വദേശിയും ഇപ്പോൾ വ്യവസായിയുമായ മുരളി കുന്നുംപുറത്തിന്റെ മുൻകാല ജീവിതത്തെ അടിസ്ഥാനമാക്കിയുള്ളതാണ് സിനിമ. ഇപ്പോഴിതാ മുരളി കുന്നുംപുറത്തിന്റെ ഫേസ്ബുക്ക് പോസ്റ്റ് ചർച്ചയാവുകയാണ്. മോഹൻലാലിനെ പറ്റിയുള്ള മുരളിയുടെ പോസ്റ്റാണ് വൈറലായിരിക്കുന്നത്.
ബ്രോഡാഡി എന്ന ചിത്രത്തിന്റെ സെറ്റിൽവെച്ച് മോഹൻലാലിനെ കണ്ട കാര്യവും തുടർന്നുള്ള സംഭവങ്ങളുമാണ് മുരളി കുറിച്ചിരിക്കുന്നത്. മോഹൻലാലിനോട് ടൈൽ ബിസിനസിനെ കുറിച്ച് സംസാരിച്ചിരുന്നുവെന്ന് മുരളി പറയുന്നു. കഴിഞ്ഞ ദിവസം വാട്ടർമാൻ ടൈലിന്റെ കേരളത്തിലെ ആദ്യ വിൽപ്പന മോഹൻലാലിന് ചെയ്തതിലെ സന്തോഷവും മുരളി വ്യക്തമാക്കുന്നുണ്ട്. ആർക്കിടെക്ചറായ ദിനേശാണ് മോഹൻലാലിന്റെ നിർദ്ദേശപ്രകാരം മുരളിയിൽ നിന്നും ടൈൽ ആവശ്യപ്പെട്ടത്.
ഒരു കാലത്ത് തന്റെ ശല്യം കാരണം ഫോൺ നമ്പർ വരെ മാറ്റിയ മോഹൻലാലിന് തന്നെ വാട്ടർമാൻ ടൈലിന്റെ ആദ്യ വിൽപന നടത്തുവാൻ സാധിച്ചതിൽ ദൈവത്തോട് നന്ദി പറയുന്നുവെന്ന് മുരളി കുറിച്ചു. ബ്രോഡാഡിയുടെ ലൊക്കേഷനിൽവെച്ച് മോഹൽലാലിനോട് തന്റെ സംരംഭത്തെ കുറിച്ച് സൂചിപ്പിച്ചിരുന്നു. ടൈൽസ് ആവശ്യമുള്ള സമയത്ത് തന്നെ ഓർക്കണമെന്നും മുരളി പറഞ്ഞിരുന്നു.
ഫേസ്ബുക്ക് പോസ്റ്റിന്റെ പൂർണ്ണരൂപം
ചില മുഹൂർത്തങ്ങൾ വാക്കുകൾ ചേർത്ത് നിർത്തി മനോഹരമായി പറഞ്ഞ് തീർക്കുവാൻ കഴിയില്ല …….. പക്ഷെ എന്റെ ജീവിത യാത്രയുടെ ഊർജ്ജം അത്രയും ചിലർ നീട്ടി തന്ന വലിയ കൈ താങ്ങുകൾ തന്നെയാണ്. കഴിഞ്ഞ വർഷം ഹൈദരബാദിൽ ബ്രോ ഡാഡിയുടെ ഷൂട്ടിങ്ങ് സൈറ്റിൽ വച്ച് ലാൽ സാറിനെ കണ്ടിരുന്നു. ടൈൽസ് ബിസിനസ്സിന്റെ കാര്യങ്ങൾ അദ്ദേഹത്തോട് സംസാരിക്കുകയും ടൈൽസ് ആവശ്യമുള്ള സമയത്ത് എന്നെ ഓർക്കണം എന്ന് സൂചിപ്പിക്കുകയും ചെയ്യതു. കുറച്ച് ദിവസങ്ങൾക്ക് ശേഷം അദ്ദേഹത്തിന്റെ ആർക്കിടെക്ചറായ ദിനേശ് സർ എന്നെ ബന്ധപ്പെടുകയും ലാൽ സാർ പറഞ്ഞത് അനുസരിച്ചാണ് വിളിക്കുന്നതെന്നും മുരളിയുടെ Waterman Tiles തന്നെ എടുക്കണമെന്നും ലാൽ സാർ പറഞ്ഞെന്നും, ഓർഡർ നൽകുകയും ചെയ്യതു
കഴിഞ്ഞ ദിവസം ലാൽ സാറിന്ന് Waterman Tiles നൽകി. അങ്ങിനെ കേരളത്തിലെ എന്റെ Waterman Tiles ന്റെ ആദ്യ വിൽപ്പന ലാൽ സാറിന് നൽക്കി എന്നത് എറെ സന്തോഷപ്രദമാണ്. ഒരു കാലത്ത് എന്റെ ശല്യം കാരണം ഫോൺ നമ്പർ വരെ മാറ്റിയ ലാൽ സാറിന് തന്നെ എന്റെ Waterman Tiles ന്റെ ആദ്യ വിൽപന നടത്തുവാൻ സാധിച്ചതിൽ ഞാൻ ദൈവത്തോട് നന്ദി പറയുന്നു.
Comments