ന്യൂഡല്ഹി: കോണ്ഗ്രസ് പ്രവര്ത്തക സമിതിയില് രാഹുല് ഗാന്ധിക്കെതിരെ രൂക്ഷ വിമര്ശനം ഉന്നയിച്ച് ജി23 നേതാക്കള്. പാര്ട്ടിയില് കൂട്ടായ തീരുമാനങ്ങള് ഇല്ലെന്നും, മുതിര്ന്ന നേതാക്കളെ രാഹുല് അവഗണിക്കുകയാണെന്നുമാണ് പ്രധാന വിമര്ശനം. അഞ്ച് സംസ്ഥാനങ്ങളിലെ നിയമസഭാ തിരഞ്ഞെടുപ്പില് വന് പരാജയം ഏറ്റുവാങ്ങിയതിന് പിന്നാലെയാണ് കോണ്ഗ്രസ് പ്രവര്ത്തക സമിതി യോഗം ചേര്ന്നത്.
മുതിര്ന്ന നേതാവായ ഗുലാം നബി ആസാദാണ് പ്രധാനമായും രാഹുലിനെതിരെ വിമര്ശനം ഉന്നയിച്ചത്. പാര്ട്ടിയില് കൂട്ടായ തീരുമാനങ്ങളില്ല. രാഹുല് ഗാന്ധിയും ഏതാനും പേരും ചേര്ന്നാണ് തീരുമാനങ്ങള് എടുക്കുന്നതെന്ന് ആസാദ് വിമര്ശിച്ചു. അജയ് മാക്കന്, രണ്ദീപ് സിങ് സുര്ജേവാല, കെ.സി.വേണുഗോപാല് എന്നിവരെയാണ് ഈ വിമര്ശനങ്ങളിലൂടെയാണ് ഗുലാം നബി ആസാദ് ലക്ഷ്യം വച്ചത്. മുതിര്ന്ന നേതാക്കളെ അവഗണിക്കുന്ന സമീപനമാണ് രാഹുലിന്റേത്.
നിലവില് രാഹുല് പാര്ട്ടിയുടെ ദേശീയ അദ്ധ്യക്ഷനല്ല. എന്നാല് സംഘടനാ കാര്യങ്ങളില് അനാവശ്യമായി ഇടപെടുന്നുണ്ട്. അധികാരസ്ഥാനത്ത് ഇല്ലാത്ത ഇത്തരം കാര്യങ്ങളില് ഇടപെടുന്നത് ശരിയല്ല. പഞ്ചാബിലെ തീരുമാനങ്ങള് പൂര്ണമായും പാളി. ഇതിന് ഉത്തരവാദികള് രാഹുലും പ്രിയങ്കയുമാണ്. അമരീന്ദര് സിങ്ങിനെ പഞ്ചാബ് മുഖ്യമന്ത്രി സ്ഥാനത്ത് നിന്ന് മാറ്റിയ സമയം ശരിയായില്ലെന്നും അദ്ദേഹം വിമര്ശിച്ചു.
