2008ലെ മുംബൈ ഭീകരാക്രമണത്തിൽ കൊല്ലപ്പെട്ട മേജർ സന്ദീപ് ഉണ്ണികൃഷ്ണന്റെ ജീവിത കഥപറയുന്ന മേജർ റിലീസിന് ഒരുങ്ങുകയാണ്. യുവതാരമായ അദിവ് ശേഷാണ് മേജർ സന്ദീപ് ഉണ്ണികൃഷ്ണനായി ചിത്രത്തിൽ എത്തുന്നത്. ഇപ്പോഴിതാ മേജർ സന്ദീപിന്റെ 45-ാം ജന്മദിനമായ ഇന്ന് ചിത്രത്തിന്റെ അണിയറ പ്രവർത്തകർ കോർത്തിണക്കിയ വീഡിയോ ശ്രദ്ധനേടുകയാണ്. അദിവ് ശേഷാണ് വീഡിയോ സോഷ്യൽ മീഡിയയിലൂടെ പങ്കുവെച്ചത്.
സന്ദീപിന്റെ യഥാർത്ഥ ജീവിത നിമിഷങ്ങൾ പുനരാവിഷ്കരിച്ചിരിക്കുന്ന ചിത്രങ്ങളാണ് അദിവ് പങ്കുവെച്ചിരിക്കുന്നത്. മേജർ സന്ദീപിന്റെ പഴയ ചിത്രങ്ങളും സിനിമയിലെ അദിവിന്റെ സമാന ചിത്രങ്ങളുമാണ് വീഡിയോയിലുള്ളത്. കുടുംബത്തിനൊപ്പമുള്ള ചിത്രങ്ങളും കുട്ടിക്കാലത്തുള്ള ചിത്രവും എല്ലാം തന്നെ വീഡിയോയിലുണ്ട്. കുട്ടിക്കാലം മുതൽ സൈന്യത്തിൽ ചേർന്നത് വരെയുള്ള നിമിഷങ്ങൾ ഒറ്റനോട്ടത്തിൽ വീഡിയോയിലൂടെ കാണാനാകും.
Presenting the HINDI video for an
ALL Indian audience 🙂A great man. A great life.
A humble Reflection on the life of #MajorSandeepUnnikrishnan #JaiHind #MajorTheFilm #MajorOnMAY27 @AdiviSesh @saieemmanjrekar @SashiTikka @sonypicsindia @urstrulyMahesh @GMBents pic.twitter.com/c2tT5MzaK3— Adivi Sesh (@AdiviSesh) March 15, 2022
2008ലെ ഭീകരാക്രമണത്തിനിടെ 14 സിവിലിയന്മാരെ രക്ഷിച്ച എൻ എസ് ജി കമാൻഡോയാണ് മലയാളിയായ മേജർ സന്ദീപ് ഉണ്ണികൃഷ്ണൻ. പരിക്ക് പറ്റിയ സൈനികനെ രക്ഷിക്കുന്നതിനിടെയായിരുന്നു സന്ദീപ് ഉണ്ണികൃഷ്ണൻ വെടിയേറ്റ് മരിച്ചത്. കോഴിക്കോട് ജില്ലയിലെ ചെറുവണ്ണൂരിലാണ് സന്ദീപ് ഉണ്ണികൃഷ്ണൻ ജനിച്ചത്. പിന്നീട് ബംഗളൂരുവിലേക്ക് താമസം മാറുകയായിരുന്നു.
ശശി കിരൺ ടിക്കയാണ് മേജർ സംവിധാനം ചെയ്യുന്നത്. നടൻ മഹേഷ് ബാബുവിന്റെ ഉടമസ്ഥതയിലുള്ള ജി മഹേഷ് ബാബു എന്റർടെയ്ൻമെന്റ്സും സോണി പിക്ചേഴ്സ് ഇന്റർനാഷണൽ പ്രൊഡക്ഷൻസും ചേർന്നാണ് നിർമ്മാണം. ഹിന്ദിയിലും മലയാളത്തിലും തെലുങ്കിലുമാണ് ചിത്രമൊരുങ്ങുന്നത്. 2020ലാണ് ചിത്രത്തിന്റെ ചിത്രീകരണം ആരംഭിക്കുന്നത്. ചിത്രം ഉടൻ റിലീസിനെത്തുമെന്നാണ് അണിയറ പ്രവർത്തകർ നൽകുന്ന വിവരം. കൊറോണ പ്രതിസന്ധി മൂലം റിലീസ് തീയതി മുൻപ് പലവട്ടം നീട്ടിവെച്ചിരുന്നു.
