പാലക്കാട്: പന്നിയങ്കര ടോൾ പ്ലാസയിൽ സ്വകാര്യ ബസുകളെ തൽക്കാലം ടോൾ വാങ്ങാതെ കടത്തി വിടും. ടോൾ പ്ലാസയിൽ സ്വകാര്യ ബസുകളിൽ നിന്നും മുന്നറിയിപ്പില്ലാതെ ടോൾ പിരിക്കാൻ ആരംഭിച്ചത് പ്രതിഷേധത്തിന് ഇടയാക്കിയിരുന്നു. തുടർന്ന് ആലത്തൂർ എംപി രമ്യ ഹരിദാസ് ഉൾപ്പെടെ കരാറ് കമ്പനിയുമായി നടത്തിയ ചർച്ചയ്ക്കൊടുവിലാണ് തീരുമാനം.
രാവിലെ ടോളിന് മുൻപിൽ ബസുകൾ ആളെയിറക്കിയ ശേഷം നിർത്തിയിട്ടിരുന്നു. രേഖാമൂലം ഒരറിയിപ്പുമില്ലാതെ വൻതുക ടോൾ കൊടുക്കാനാവില്ലെന്നും ജീവനക്കാർ അറിയിച്ചു. പോലീസ് എത്തി സർവീസ് തുടരാൻ ആവശ്യപ്പെട്ടെങ്കിലും ബസ് ജീവനക്കാർ സമരം തുടർന്നു ഒടുവിൽ ടോൾ പിരിക്കില്ലെന്നു് അറിയിച്ചതോടെയാണ് പ്രതിഷേധ സമരം അവസാനിപ്പിച്ചത്.
വടക്കഞ്ചേരി, കണ്ണമ്പ്ര, കിഴക്കഞ്ചേരി, വണ്ടാഴി, പുതുക്കോട് പഞ്ചായത്തുകളിലെ യാത്രക്കാർക്ക് ആധാർകാർഡ് കാണിച്ചാൽ സൗജന്യമായി കടന്നുപോകാനുള്ള സംവിധാനം ടോൾ വിഷയത്തിൽ തീരുമാനമുണ്ടാകും വരെ തുടരും. സൗജന്യ പാസ് നൽകുന്ന കാര്യത്തിൽ പി.പി.സുമോദ് എംഎൽഎയുടെ നേതൃത്വത്തിൽ അടുത്ത ദിവസം വീണ്ടും ചർച്ച നടക്കും. ടോൾ പ്ലാസയിൽ സ്കൂൾ വാഹനങ്ങൾക്കും നിരക്ക് കുറവ് വേണമെന്ന് ആവശ്യം ശക്തമാണ്.
Comments