വലിയ തിരക്കുകളൊന്നും ഇല്ലാത്ത സുന്ദരമായ ഒരു ഗ്രാമജീവിതം സ്വപ്നം കാണാത്തവർ അധികമുണ്ടാവില്ല. പ്രതേകിച്ച് നഗരത്തിരക്കുകൾക്കിടയിൽ ആളുകൾ ശ്വാസം മുട്ടി കഴിയുന്ന ഈ പുതിയ കാലത്ത്. എന്നാൽ ഈ തിരക്കുകൾ ഒന്നും ഇല്ലാത്ത ഒരു ഗ്രാമം ഭൂമിയിലുണ്ട്. റോഡുകളില്ലാത്ത ഒരു ഗ്രാമം. നെതർലാൻഡ്സിലെ വെനീസ് എന്നറിയപ്പെടുന്ന പൗരാണിക ഗ്രാമമായ ഗീതോൺ. വാഹനങ്ങളില്ലാത്ത ഗ്രാമത്തിൽ ജനവാസം തീരെയില്ലെന്ന് കരുതിയാലും തെറ്റി. ഇവിടെ ഒരുപാട് ആൾക്കാരുമുണ്ട്. അവർ പണിത അതിമനോഹരമായ വീടുകളുമുണ്ട്. വീടിനു പുറത്തെ റോഡുകൾക്ക് പകരം ഇവിടെ കനാലുകളാണ് ഉള്ളത്. കാറുകൾക്കും മറ്റ് വാഹനങ്ങൾക്കും പകരം ബോട്ടുകളും. ഒരു സ്ഥലത്ത് നിന്ന് മറ്റൊരിടത്തേയ്‌ക്ക് പോകണമെങ്കിലിൽ ബോട്ടിൽ തന്നെ പോകണം. നോക്കാം ഗീതോൺ നഗരത്തിന്റെ വിശേഷങ്ങൾ.
കിഴക്കൻ നെതർലാൻഡ്സിലെ പ്രവിശ്യയായ ഓവറൈസിലാണ് ഈ ഗ്രാമം സ്ഥിതി ചെയ്യുന്നത്. പ്രകൃതിയുടെ മനോഹാരിതയെ മുഴുവൻ തന്നിലേക്ക് ആവാഹിച്ചെടുത്തിട്ടുണ്ട് ഈ കൊച്ചു ഗ്രാമം. ഗീതോൺ എന്ന് ഈ ഗ്രാമത്തിന് പേര് ലഭിക്കാനൊരു കാരണമുണ്ട്. എന്താണെന്ന് വെച്ചാൽ പത്താം നൂറ്റാണ്ടിലുണ്ടായ വെള്ളപ്പൊക്കത്തിന്റെ അവശിഷ്ടങ്ങളായ നൂറുകണക്കിന് ഗോട്ട്ഹോൺസ് അഥവാ ആട്ടിൻ കൊമ്പുകൾ ഈ ഗ്രാമത്തിൽ നിന്നും കണ്ടെത്തിയിരുന്നു. അങ്ങെയാണ് ഈ നാടിന് ഗീതോൺ എന്ന പേര് ലഭിച്ചത്.
നെതർലാൻഡ്സിന്റെ തലസ്ഥാനമായ ആംസ്റ്റർഡാമിൽ നിന്ന് വെറും രണ്ട് മണിക്കൂർ യാത്ര ചെയ്താൽ ഗീതോണിലെത്താം. 1958ൽ ഡച്ച് ഫിലിം ഡയറക്ടറായ ബെർറ്റ് ഹൻസ്ട്ര അദ്ദേഹത്തിന്റെ ‘ഫാൻഫെയർ’ എന്ന ചിത്രത്തിലൂടെ ഗീതോണിനെ ലോക പ്രശസ്തമാക്കി. അതിനുശേഷം ഇവിടേക്ക് വിനോദസഞ്ചാരികൾ ധാരാളമായി ഒഴുകിയെത്താൻ തുടങ്ങി. എന്നാൽ പ്രശാന്ത സുന്ദരമായ ഗ്രാമീണ കാഴ്ചകൾ സ്വപ്നം കണ്ട് ഗീതോണിലെത്തുന്നവർ തങ്ങളുടെ വാഹനങ്ങളെല്ലാം പുറത്ത് പാർക്ക് ചെയ്തു വേണം അകത്തേക്ക് പ്രവേശിക്കാൻ. കാൽനടയായോ അല്ലെങ്കിൽ ബോട്ടുകളിലൂടെയോ മാത്രമേ ഈ ഗ്രാമത്തിൽ ചുറ്റിക്കറങ്ങാൻ സാധിക്കൂ.
നാലുപാടും കനാലുകളാൽ ചുറ്റപ്പെട്ട ഗീതോണിന്റെ പ്രധാന പ്രത്യേകത ഇവിടെ റോഡുകളില്ല എന്നത് തന്നെയാണ്. ആധുനിക ഗതാഗത സംവിധാനങ്ങൾ ഒന്നും തന്നെയില്ലാത്ത ഈ ഗ്രാമത്തിൽ ജനങ്ങൾ എങ്ങനെ യാത്ര ചെയ്യുന്നു എന്നറിയാൻ ഏവർക്കും കൗതുകമുണ്ടാവും. അത് അറിയാൻ വേണ്ടി തന്നെ ഒരുപാട് ആളുകൾ ഇവിടേയ്‌ക്ക് എത്താറുണ്ട്. ഇവിടുത്തെ ഗ്രാമവാസികളുടെ യാത്രകളെല്ലാം കെട്ടുവള്ളങ്ങളിലും ബോട്ടുകളിലും കൂടിയാണ്. കനാലുകളിലൂടെയും ബോട്ടുകളിലുമാണ് അവർ വീടുകളിലേക്ക് എത്തിച്ചേരുന്നതും. കനാലുകൾക്ക് കുറുകെയായി ഏകദേശം 176 പാലങ്ങൾ ഇവിടെയുണ്ട്.
ഇവിടുത്തെ ബോട്ടുകൾക്കുമുണ്ട് പ്രത്യേകത. ശബ്ദമില്ലാത്ത എൻജിനുകൾ ഉപയോഗിച്ചാണ് അവ നിർമ്മിച്ചിട്ടുള്ളത്. അതുകൊണ്ട് തന്നെ ഇവിടുത്തെ ബോട്ടുകൾ ‘വിസ്പറിംഗ് ബോട്ടുകൾ’ എന്നാണ് അറിയപ്പെടുന്നത്. ബോട്ട് യാത്രയ്‌ക്ക് പുറമേ കനാലുകളുടെ ഇരുവശങ്ങളിലുമുള്ള ചെറിയ നടപ്പാതകളിലൂടെയും ആളുകൾക്ക് യാത്ര ചെയ്യാം. നടപ്പാതകളിലൂടെയുള്ള സൈക്കിൾ സഞ്ചാരം ഇവിടുത്തെ പതിവ് കാഴ്ചകളിലൊന്നാണ്. നെതർലാൻഡ്സിലെ ഒരു ഔദ്യോഗിക വാഹനം തന്നെയാണ് സെക്കിൾ. ഈ രാജ്യത്തെ സാധാരണക്കാരൻ മുതൽ പ്രധാനമന്ത്രിവരെ സൈക്കിളിൽ യാത്ര ചെയ്യുന്നത് കാണാം.
ഇതിനൊക്കെ പുറമേ നെതർലാൻഡ്സിലെ ഒരു പൗരാണിക ഗ്രാമം കൂടിയാണ് ഗീതോൺ. അമൂല്യമായ പുരാവസ്തു ശേഖരങ്ങളും ഇവിടെയുണ്ട്. രുചികരമായ ഭക്ഷണവും വിഭവങ്ങളും ഒരുക്കിയാണ് ഇവിടുത്തെ റസ്റ്റോറന്റുകളും കഫേകളും വിനോദസഞ്ചാരികളെ സ്വീകരിക്കുന്നത്. പ്രശാന്ത സുന്ദരമായ ഈ തുരുത്തിൽ കാതോർത്താൽ പ്രകൃതിയുടെ അനശ്വര സംഗീതം ആസ്വദിക്കാം. കാരണം അരുവികളുടെയും പക്ഷികളുടെയും ശബ്ദമല്ലാതെ മറ്റൊരു ശബ്ദവും ഇവിടെ നിങ്ങളെ അലോസരപ്പെടുത്തില്ല. വിനോദ സഞ്ചാരികളെ ആകർഷിക്കാനായി പ്രത്യേക ബോട്ട് ടൂറിസം പദ്ധതി തന്നെ ഗീതോണിൽ തയ്യാറാക്കിയിട്ടുണ്ട്.
തിരക്കേറിയ ജീവിത യാത്രക്കിടയിൽ കുറച്ച് ശാന്തത ആഗ്രഹിക്കാത്തവർ ആരുണ്ട്… ആരും തന്നെയുണ്ടാവില്ല… കെ-റെയിലിനും അതിവേഗ പാതകളുമില്ലാതെ വികസനവും പുരോഗതിയും പൂർണമാകില്ലെന്ന് ചിന്തിക്കുന്നർ കണ്ണ് തുറന്ന് കാണേണ്ടതുതന്നെയാണ് ഗീതോണിലെ കാഴ്ചകൾ…..
