കുടവയറൻമാരിൽ നിന്നും മസിലൻമാരാകാൻ ആഗ്രഹിക്കുന്നവരാണ് നമ്മുടെ യുവത്വം. ഇതിനായി ജിമ്മിൽ പോയി കഠിനമായ വ്യായാമ മുറകൾ അനുഷ്ടിക്കാനും, ഇഷ്ടഭക്ഷണങ്ങൾ ഒഴിവാക്കാനും മടിക്കുന്നില്ല. കൃത്യമായ ആഹാരക്രമമാണ് ദൃഢമായ പേശികൾ സ്വന്തമാക്കാനുള്ള ഒരു ഉപാധി. ഇതിനായി പലവിധ ഡയറ്റുകൾ പരീക്ഷിക്കാറുണ്ട്. എന്നാൽ റിയൽ ലൈഫ് വൂൾവെറെയ്ൻ എന്ന ചെല്ലപ്പേരിട്ട് വിളിക്കുന്ന വീം ബ്രെയിഷ് എന്ന മസിലന്റെ ഭക്ഷണക്രമം ഞെട്ടിക്കുന്നതാണ്.
മസിൽ വർദ്ധിപ്പിക്കാൻ സാധാരണയായി ഹെവി ഡയറ്റോ അല്ലെങ്കിൽ വീഗൺ ഡയറ്റോ ആണ് പിന്തുടരാറുള്ളത്. എന്നാൽ ഇതിൽ നിന്നെല്ലാം വ്യത്യസ്തമായി പച്ചമാസം മാത്രം കഴിച്ചാണ് ലോസ് ആഞ്ചൽസ് സ്വദേശിയും ഫിറ്റ്‌സന് കോച്ചുമായ വീം ബ്രെയ്ഷ് തന്റെ ആരോഗ്യം സംരക്ഷിക്കുന്നത്. ചെറുപ്പം തൊട്ടുതന്നെ പച്ചമാസം കഴിക്കാൻ ഇഷ്ടപ്പെട്ടിരുന്ന വീം താൻ ആദ്യം പിന്തുടർന്ന വീഗൺ ഡയറ്റിൽ നിന്നും പതിയെ പിന്തിരിയുകയായിരുന്നു.
ഒരു ദിവസം വീം കഴിക്കുന്ന ആഹാരത്തിൽ 90 ശതമാനവും വേവിക്കാത്ത പച്ചമാംസം ആണ്. മൃഗങ്ങളുടെ തലച്ചോർ, ഹൃദയം, കരൾ, വൃക്കകൾ എന്നിവയെല്ലാം പച്ചയ്‌ക്ക് തിന്നും. ഇതോടൊപ്പം തന്നെ ചെറിയ അളവിൽ ഇലക്കറികളും, ധാന്യങ്ങളും വീം കഴിക്കാറുണ്ട്. മസിൽ വർദ്ധിപ്പിക്കാൻ ഒരു ദിവസം വീം കഴിക്കുന്ന ആഹാരത്തിന്റെ അളവ് കേട്ടാൽ നാം ഞെട്ടും. 4500 കലോറി ഭക്ഷണം ആണ് തന്റ മസിൽ പരിപോഷിപ്പിക്കുന്നതിനായി അദ്ദേഹം അകത്താക്കുന്നത്.
മൂന്ന് നേരം മാത്രമാണ് വീം ആഹാരം കഴിക്കാറുള്ളത്. ഇതിന് പ്രത്യേക ക്രമമുണ്ട്. രാവിലെയും രാത്രിയും വളരെ ലൈറ്റായി ആഹാരം കഴിക്കുന്ന വീമിന്റെ ഉച്ചഭക്ഷണം വിഭവ സമൃദ്ധമാണ്.
രാവിലെ വ്യായമത്തിന് ശേഷം വേവിക്കാത്ത ഇറച്ചി, വെണ്ണ, രണ്ട് മുട്ട എന്നിവ മാത്രമുള്ള ലളിതമായ ഭക്ഷണ ക്രമമാണ് അദ്ദേഹം പിന്തുടരുന്നത്. എന്നാൽ ഉച്ചയ്‌ക്ക് അൽപ്പം ഹെവിയാണ്. പച്ചമാസത്തിന് പുറമേ മൃഗങ്ങളുടെ തലച്ചോർ, കരൾ, വൃക്കകൾ, എല്ല്, മജ്ജ എന്നിവ കഴിക്കും. ഒരു ഗ്ലാസ് നിറയെ പച്ചമുട്ടയും കുടിച്ചാൽ ഉച്ച ഭക്ഷണം കുശാലായി. രാത്രി പച്ച ഇറച്ചി കൂടാതെ പുല്ലുകളോ, ഇലകളോ കൊണ്ടുള്ള ഷേയ്‌ക്കും കുടിക്കും. മൃഗങ്ങളുടെ തലച്ചോറും, ഹൃദയവുമാണ് വീമിന്റെ ഇഷ്ട ഭക്ഷണം.
പച്ചമാംസം മാത്രം കഴിച്ചുകൊണ്ടുള്ള ഡയറ്റ് അസാധാരണം ആണെങ്കിൽ തികച്ചും ആരോഗ്യപ്രദമാണെന്നാണ് വീം പറയുന്നത്. പച്ചമാസം പോഷകസമൃദ്ധം മാത്രമല്ല, മറിച്ച് രക്തസമ്മർദ്ദം, ഹൃദയസംബന്ധമായ അസുഖങ്ങൾ എന്നിവ വരാതെ ശരീരത്തെ സംരക്ഷിക്കുകയും ചെയ്യുന്നു. ഇറച്ചിയിലെ ബാക്ടീരിയകൾ ശരീരത്തിൽ ചെന്നാൽ അപകടമാണെന്നാണ് ചിലരുടെ വാദം. എന്നാൽ കഴിക്കുന്ന ഭക്ഷണത്തിലെ പോഷണങ്ങൾ ഇതിൽ നിന്നും സംരക്ഷിക്കുമെന്നും അദ്ദേഹം വ്യക്തമാക്കുന്നു.
തന്റെ ഡയറ്റ് രീതി സമൂഹമാദ്ധ്യമങ്ങളിലൂടെ വീം പങ്കുവെയ്‌ക്കാറുണ്ട്. മൃഗങ്ങളുടെ തലച്ചോർ ഉൾപ്പെടെ പച്ചയ്‌ക്ക് തിന്നുന്നത് സാധാരണക്കാർക്ക് കണ്ടിരിക്കുക പ്രയാസമാണെങ്കിലും, ഫിറ്റ്‌നസ് ഫ്രീക്കന്മാരിൽ പലരും ഇത് അനുകരിക്കുന്നുണ്ട എന്നതാണ് വാസ്തവം. ആയിരക്കണക്കിന് ആരാധകരമാണ് വീമിനുള്ളത് എന്ന വസ്തുതയും, അമ്പരപ്പിക്കുന്നു.
അതേസമയം, പോസ്റ്റ്ുകൾ നീക്കം ചെയ്യണമെന്ന് വീമിനെ ഭീഷണിപ്പെടുത്തുന്ന ധാരാളം സസ്യാഹാരികളുണ്ട്. എന്നാൽ വീം അതൊന്നും കാര്യമാക്കുന്നില്ല.
