കിരീടം കൈവിട്ടെങ്കിലും ആരാധകരുടെ മനസ് കവർന്ന് ബ്ലാസ്റ്റേഴ്‌സ്

മഡ്ഗാവ്: ഒന്നാന്തരം സീസൺ, നിർഭാഗ്യവശാൽ അത് അവസാനിച്ചത് ഹൃദയഭേദകമായി. ഐഎസ്എൽ കലാശക്കളിയിൽ പെനാൽറ്റി ഷൂട്ടൗട്ടിൽ അപ്രതീക്ഷിത തോൽവി ഏറ്റുവാങ്ങി മിനിറ്റുകൾക്കകം കേരള ബ്ലാസ്‌റ്റേഴസ് സമൂഹമാദ്ധ്യമങ്ങളിലിട്ട ആദ്യ പോസ്റ്റുകളിലൊന്നിലെ വാചകമായിരുന്നു ഇത്. അവസാന നിമിഷം കിരീടം കൈവിട്ടെങ്കിലും ലക്ഷക്കണക്കിന് വരുന്ന ആരാധകരുടെ മനസ് നിറച്ചാണ് ബ്ലാസ്‌റ്റേഴ്‌സ് നായകൻ അഡ്രിയാൻ ലൂണയും കൂട്ടരും മടങ്ങുന്നത്.

കിരീടത്തിനായി ഇഞ്ചോടിഞ്ച് പൊരുതിയ ബ്ലാസ്റ്റേഴ്‌സിന്റെ ഓരോ നീക്കങ്ങളും ഫറ്റോർഡ സ്‌റ്റേഡിയം ഇതുവരെ കാണാത്ത ആവേശവും ആരവവുമായിരുന്നു ഗാലറിയിൽ തീർത്തത്. എതിരാളിയുടെ ഗോൾമുഖം ലക്ഷ്യമാക്കിയുളള ഒന്നിലധികം ഷോട്ടുകൾ നിർഭാഗ്യത്താൽ വിഫലമായപ്പോഴും മഞ്ഞക്കുപ്പായമിട്ട് ഗാലറിയിൽ തിങ്ങിനിറഞ്ഞ ആരാധകർ പ്രിയപ്പെട്ട ടീമിനെ പ്രോത്സാഹിപ്പിച്ചുകൊണ്ടിരുന്നു.

കിരീടം കൊതിച്ചിരുന്നെങ്കിലും കൈവിട്ടതിൽ ആരാധകർക്ക് നിരാശയില്ല. 120 മിനിറ്റ് വരെ നീണ്ട മത്സരത്തിന്റെ തുടക്കം മുതൽ ഓരോ നിമിഷവും അവർ ആവേശത്തിലായിരുന്നു. ഗോൾരഹിതമായിരുന്ന ആദ്യ പകുതിയുടെ പിരിമുറുക്കം അവസാനിപ്പിച്ച് 68 ാം മിനിറ്റിൽ മലയാളി താരം കെ.പി രാഹുൽ വല കുലുക്കിയതോടെ ഫറ്റോർഡയിലെ ഗാലറിയിൽ മഞ്ഞവസന്തം വിരിഞ്ഞു. പിന്നെയും ബ്ലാസ്റ്റേഴ്‌സിന്റെ ആധിപത്യത്തിൽ 10 മിനിറ്റുകൾ കൂടി. 88 ാം മിനിറ്റിൽ ഹൈദരാബാദിന്റെ മടക്കഗോളിന് വഴങ്ങിയപ്പോഴും ആരാധകർക്ക് ഉറച്ച പ്രതീക്ഷയായിരുന്നു.

സബ്സ്റ്റിറ്റിയൂട്ട് താരം സാഹിൽ തവോറയാണ് ഹൈദരാബാദിനായി ഗോൾ മടക്കിയത്. ഇഞ്ച്വറി ടൈമിലും എക്‌സ്ട്രാ ടൈമിലും ഹൈദരാബാദിന്റെ മികച്ച പല നീക്കങ്ങളും ബ്ലാസ്റ്റേഴ്‌സിന്റെ താരങ്ങൾ വിഫലമാക്കിയതോടെ കിരീടം കൈയ്യെത്തും ദൂരത്തെന്ന പ്രതീക്ഷയിലായിരുന്നു ആരാധകർ. എന്നാൽ പെനാൽറ്റി ഷൂട്ടൗട്ടിലേക്ക് നീങ്ങിയതോടെ ആരാധകരുടെ ആവേശം പിരിമുറുക്കത്തിലേക്ക് വഴിമാറി. ഒടുവിൽ 3-1 ന് ഹൈദരാബാദ് എഫ്‌സിയുടെ വിജയം.

11,500 കാണികളായിരുന്നു ഫറ്റോർഡ സ്‌റ്റേഡിയത്തിൽ മത്സരം കാണാനെത്തിയത്. ഇവരിൽ പകുതിയിലധികവും മലയാളികൾ. ബസ് ഉൾപ്പെടെ ബുക്ക് ചെയ്ത് പ്രിയപ്പെട്ട ടീമിന്റെ കലാശക്കളിയിലെ പോരാട്ടം കാണാൻ ഗോവയിൽ എത്തിയവർ. ഇത് കൂടാതെ കേരളത്തിലെ മിക്കയിടങ്ങളിലും വലിയ സ്‌ക്രീനുകൾ സ്ഥാപിച്ച് മത്സരം തത്സമയം പ്രദർശിപ്പിക്കുകയും ചെയ്തു. ഇവിടെയൊക്കെ കലാശക്കളിയുടെ ആവേശം ഏറ്റുവാങ്ങാനെത്തിയത് ആയിരങ്ങളാണ്.

കിരീടം അവസാന നിമിഷം കൈവിട്ടെങ്കിലും കേരളത്തിലെ ഫുട്‌ബോൾ ആരാധകർക്ക് ബ്ലാസ്‌റ്റേഴ്‌സ് ഒരു വികാരമാണ്. തോൽവിയിലും കൈവിടാതെ നെഞ്ചേറ്റുന്ന വികാരം….