കറാച്ചി: ഖത്തർ എയർവെയ്‌സിന്റെ ഡൽഹി-ദോഹ വിമാനം പാകിസ്താനിലെ കറാച്ചിയിലേക്ക് തിരിച്ചുവിട്ടു. സാങ്കേതിക തകരാർ മൂലമാണെന്നാണ് വിവരം. വിമാനത്തിൽ നൂറിലധികം യാത്രക്കാരുണ്ട്. പുലർച്ചെ 3.50ന് ഡൽഹിയിൽ നിന്ന് പുറപ്പെട്ട വിമാനം 5.30ഓടെയാണ് കറാച്ചിയിൽ ഇറക്കിയത്.
ഖത്തർ എയർവേയ്സിന്റെ ക്യൂആർ579 വിമാനമാണ് കറാച്ചിയിലേക്ക് തിരിച്ചുവിട്ടത്. മാർച്ച് 21ന് ഡൽഹിയിൽ നിന്ന് പുറപ്പെട്ട വിമാനത്തിന്റെ കാർഗോ ഹോൾഡിൽ പുക ഉയരുന്നത് ശ്രദ്ധയിൽപ്പെട്ടതിന് പിന്നാലെയാണ് നടപടി. നിലവിൽ വിമാനം സുരക്ഷിതമായി കറാച്ചിയിൽ ഇറക്കിയതായും എമർജൻസി സർവീസുമായി ബന്ധപ്പെട്ടതായും ഖത്തർ എയർവെയ്‌സ് അറിയിച്ചു. അതേസമയം വിമാന ജീവനക്കാരുടെ പെരുമാറ്റത്തിൽ ഉൾപ്പെടെ പരാതി ഉയർന്നിട്ടുണ്ടെന്നാണ് വിവരം.
സംഭവത്തെക്കുറിച്ച് അന്വേഷണം ആരംഭിച്ചിട്ടുണ്ട്. സാങ്കേതിക തകരാർ സംഭവിച്ചതിന് കാരണമെന്തെന്ന് ഇതുവരെ വ്യക്തമായിട്ടില്ല. കറാച്ചിയിൽ ഇറക്കിയ യാത്രക്കാരെ ദോഹയിലേക്ക് എത്തിക്കുന്നതിനായി ബദൽ വിമാനം ഉടനെ തരപ്പെടുത്തുമെന്നും ഖത്തർ എയർവെയ്‌സ് അറിയിച്ചു. യാത്രക്കാർ നേരിട്ട അസൗകര്യത്തിനും വിമാന കമ്പനി ക്ഷമ ചോദിച്ചു.
Comments