ന്യഡൽഹി: കശ്മീരി പണ്ഡിറ്റുകളുടെ ദുരിതവും പലായനവും പ്രമേയമാക്കി വിവേക് അഗിനിഹോത്രി സംവിധാനം ചെയ്ത ‘ദി കശ്മീർ ഫയൽസ്’ മികച്ച കളക്ഷൻ നേടി മുന്നേറുന്നു. ചിത്രം 10ാം ദിവസം 28 കോടി കളക്ഷൻ നേടി. ബോക്സ് ഓഫീസ് ഇന്ത്യ റിപ്പോർട്ട് പ്രകാരം ഞായറാഴ്ച ഏകദേശം 27-28 കോടി രൂപ നേടി. ഒമ്പതാം ദിനത്തിൽ 24.80 കോടി രേഖപ്പെടുത്തി. ഞായറാഴ്ചത്തെ കളക്ഷൻ അത് മറികടന്നു.
ഇതോടെ സിനിമയുടെ ആകെ കളക്ഷൻ 170 കോടി രൂപയോളം എത്തി. അതിനിടെ സിനിമ നിർമ്മാതാക്കൾ പരമാവധി പ്രേക്ഷകരിലേക്ക് പ്രദർശനം എത്തിക്കുന്നതിനായി ശ്രമിച്ചു കൊണ്ടിരിക്കുകയാണ്. യുഎസിലും കാനഡയിലും മികച്ച പ്രേക്ഷക ശ്രദ്ധ നേടിയ ചിത്രം അടുത്തിടെ നേപ്പാളിൽ റിലീസ് ചെയ്തു. തമിഴ്, തെലുങ്ക്, കന്നഡ, മലയാളം ഭാഷകളിലേക്കും ചിത്രം ഡബ്ബ് ചെയ്യുന്നുണ്ട്.
തമിഴ്‌നാട്, തെലങ്കാന, കർണാടക, കേരളം തുടങ്ങിയ സംസ്ഥാനങ്ങളിൽ ഡബ്ബ് ചെയ്ത പതിപ്പുകൾ ഉടനെ തിയറ്ററുകളിൽ എത്തും. ഇപ്പോൾ ഹിന്ദി ചിത്രം ഇംഗ്ലീഷ് സബ്‌ടൈറ്റിലുകളോടെ ലഭ്യമാണ്. ആദ്യ ദിനം വെറും 630 തിയേറ്ററുകളിൽ റിലീസ് ചെയ്ത ചിത്രം ഇപ്പോൾ 4000-ലധികം കേന്ദ്രങ്ങളിലാണ് പ്രദർശനം നടത്തുന്നത്. വിദേശത്തുള്ള 320 സ്‌ക്രീനുകൾ ഉൾപ്പെടെ മൊത്തം സ്‌ക്രീനുകളുടെ എണ്ണം 4320 ആയി. കൂടാതെ ലോകമെമ്പാടും 11,200ലധികം ഷോകൾ നടത്തിയിട്ടുണ്ട്.
