മനില: പെയ്ന്റ്, കളർ പെൻസിൽ, മണ്ണ്, കരിക്കട്ട, വിവിധ വർണങ്ങളിലുള്ള പൊടികൾ എന്നിവ ഉപയോഗിച്ച് ആളുകൾ മനോഹരമായ ചിത്രങ്ങൾ വരയ്ക്കുന്നത് നാം കണ്ടിട്ടുണ്ട്. ബാർബർ ഷോപ്പുകളിൽ മുറിച്ചിട്ടിരിക്കുന്ന ആളുകളുടെ മുടി ഉപയോഗിച്ചും ആളുകൾ ചിത്രം വരയ്ക്കുന്നതിനെ കുറിച്ചും നാം കേട്ടിട്ടുണ്ട്. എന്നാൽ ജെസ്റ്റോണി ഗാർഷ്യ എന്ന വ്യക്തി അൽപം വ്യത്യസ്തനാണ്. ഗാർഷ്യ പടം വരയ്ക്കുന്നത് തന്റെ സ്വന്തം തലമുടി മുറിച്ചാണ്
മനിലയിലെ ഹെയർ സലൂണിന്റെ സഹ-ഉടമയാണ് ജെസ്റ്റോണി ഗാർഷ്യ. ഫിലിപ്പൈൻസിലെ നാവിക സേന ഉദ്യോഗസ്ഥൻ കൂടിയായ ഗാർഷ്യയ്ക്ക് പടം വരയ്ക്കുക എന്നതാണ് ഏറ്റവും ഇഷ്ടമുള്ള കാര്യം. എന്നാൽ എട്ട് മാസത്തോളം ജോലിയുടെ ഭാഗമായി കപ്പലിൽ കഴിയേണ്ടി വരുമ്പോൾ, പെയിന്റ്, സ്കെച്ച്പാഡുകൾ തുടങ്ങിയ സാധനങ്ങളുടെ ക്ഷാമം നേരിടേണ്ടിവരും അതിനാലാണ് സ്വന്തം മുടി മുറിച്ച് പടം വരയ്ക്കാൻ ആരംഭിച്ചതെന്നാണ് ഗാർഷ്യ പറയുന്നത്.
മുടിയും, നേർത്ത ബ്രഷും, ഒരു പ്രത്യേകതരം പശയും ഉപയോഗിച്ചാണ് ഗാർഷ്യ ചിത്രം വരയ്ക്കുന്നത്. മുറിച്ചെടുത്ത സ്വന്തം മുടി വെളുത്ത ക്യാൻവാസിൽ വിതറി, അവ ബ്രഷ് ഉപയോഗിച്ച് ക്രമീകരിച്ചാണ് അദ്ദേഹം വര പൂർത്തിയാക്കുന്നത്. സംഗീതജ്ഞരുടെയും അഭിനേതാക്കളുടെയും ചിത്രങ്ങളാണ് കൂടുതലും വരയ്ക്കാറുള്ളത്. ഇവ ഇത്തരത്തിൽ നിർമ്മിച്ചെടുക്കാൻ അഞ്ച് മണിക്കൂർ വരെ വേണ്ടി വരുമെന്നും അദ്ദേഹം വ്യക്തമാക്കി.
2021ലാണ് ഗാർഷ്യ സ്വന്തം മുടി ഉപയോഗിച്ച് ചിത്രങ്ങൾ സൃഷ്ടിക്കാൻ തുടങ്ങിയത്. തുടക്കകാലത്ത് സ്വന്തം ചിത്രങ്ങൾ വരയ്ക്കാൻ ആരംഭിച്ച ഗാർഷ്യ ഇന്ന് സെലിബ്രിറ്റികളെ ഉൾപ്പെടെ വരയ്ക്കാറുണ്ട്. ചില സന്ദർഭങ്ങളിൽ മുടി മതിയാകാതെ വരുമ്പോൾ, താടിയും ഉപയോഗിക്കാറുണ്ടെന്നാണ് ഗാർഷ്യ പറയുന്നത്. ദീർഘദൂര കടൽ യാത്രകൾ തന്റെ ശാരീരികവും മാനസികവുമായ ആരോഗ്യത്തെ ബാധിക്കുന്നതിനാൽ ഇത്തരത്തിൽ ചിത്രങ്ങൾ നിർമ്മിക്കുന്നതിലൂടെ തന്റെ സമ്മർദ്ദം കുറയുന്നു എന്നാണ് അദ്ദേഹം വ്യക്തമാക്കുന്നത്.
Comments