മുംബൈ : കാവി ഷാൾ ധരിച്ച് ദി കശ്മീർ ഫയൽസ് കാണാനെത്തിയ യുവതികളുടെ ഷാൾ അഴിപ്പിച്ച് തിയറ്റർ ജീവനക്കാർ. മഹാരാഷ്ട്രയിലെ നാസിക്കിലാണ് സംഭവം. തുടർന്ന് കാവി ഷാൾ ് അഴിച്ചുവെച്ച ശേഷമാണ് യുവതികൾ സിനിമ കണ്ടത്.
ബുധനാഴ്ചയായിരുന്നു സംഭവം. ഹാളിലേക്ക് പ്രവേശിക്കാൻ നേരമാണ് യുവതികളോട് കാവി ഷാൾ അഴിക്കാൻ ജീവനക്കാർ ആവശ്യപ്പെട്ടത്. സംഭവം ചോദ്യം ചെയ്തതെങ്കിലും ഷാൾ ധരിച്ച് തിയറ്ററിൽ പ്രവേശിപ്പിക്കാൻ കഴിയില്ലെന്ന് ജീവനക്കാർ നിലപാട് സ്വീകരിക്കുകയായിരുന്നു. തുടർന്ന് പുറത്ത് ഷാൾ അഴിച്ചുവെച്ചു. ഇതിന് ശേഷമാണ് ഹാളിലേക്ക് ജീവനക്കാർ പ്രവേശനം നൽകിയത്.
സംഭവത്തിൽ മഹാരാഷ്ട്ര സർക്കാരിനെതിരെ ശക്തമായ പ്രതിഷേധവുമായി ബിജെപി രംഗത്ത് എത്തി. ഇതാണോ ഹിന്ദുക്കളോടുള്ള ശിവസേനയുടെയും സർക്കാരിന്റെയും സമീപനം എന്നായിരുന്നു ബിജെപി ചോദിച്ചത്. സംഭവം ഔദ്യോഗിക ട്വിറ്റർ പേജിലും ബിജെപി പങ്കുവെച്ചിട്ടുണ്ട്.
