മലപ്പുറം: വിവിധ ബാങ്കുകളിൽ മുക്കുപണ്ടം പണയം വെച്ച് അഞ്ച് ലക്ഷത്തോളം രൂപ തട്ടിയെന്ന കേസിൽ പ്രതി അറസ്റ്റിൽ. ഏമങ്ങാട് സ്വദേശി കറുത്തേടത്ത് അസ്കറിനെയാണ് (49) വണ്ടൂർ പോലീസ് അറസ്റ്റ് ചെയ്തത്. വണ്ടൂരിലെ ഫെഡറൽ ബാങ്ക് ശാഖയിലും പൂക്കോട്ടുംപാടത്തെ സ്വകാര്യ ബാങ്കിലുമാണ് സമാന രീതിയിൽ തട്ടിപ്പ് നടത്തിയതെന്നാണ് പോലീസിന്റെ കണ്ടെത്തൽ.
ആദ്യം പൂക്കോട്ടുംപാടത്തെ സ്വകാര്യ ബാങ്കിലെത്തിയ അസ്കർ വള പണയം വെച്ചാണ് രണ്ട് ലക്ഷത്തിലധികം രൂപ കൈക്കലാക്കിയതെന്നാണ് കേസ്. ബാങ്കിൽ സ്വർണം പണയം വെച്ച് വായ്പയെടുക്കുന്ന സാധാരണ ഇടപാടിന്റെ മറവിലായിരുന്നു തട്ടിപ്പെന്നാണ് വിവരം.
ഇതിന് പിന്നാലെ ജൂൺ, ജൂലൈ മാസങ്ങളിലായി വണ്ടൂരിലെ ഫെഡറൽ ബാങ്കിലും സമാന രീതിയിലുള്ള ഇടപാടുകൾ നടത്തിയതായി പോലീസ് പറയുന്നു. രണ്ട് വ്യത്യസ്ത അക്കൗണ്ടുകളിലായാണ് ഇവിടെ 11 ഗ്രാം മുക്കുപണ്ടം പണയം വെച്ചത്. ഇതുവഴി രണ്ട് ലക്ഷത്തിലധികം രൂപ ഇയാൾ കൈക്കലാക്കിയെന്നാണ് അന്വേഷണ സംഘത്തിന്റെ കണ്ടെത്തൽ.
എന്നാൽ ഇടപാടുകളിൽ ബാങ്ക് അധികൃതർക്ക് സംശയം തോന്നിയതോടെയാണ് തട്ടിപ്പ് പുറത്തായത്. പണയമായി സ്വീകരിച്ച ആഭരണങ്ങളിൽ സംശയം തോന്നിയതിനെ തുടർന്ന് നടത്തിയ പരിശോധനയിലാണ് അവ യഥാർഥ സ്വർണമല്ലെന്നും മുക്കുപണ്ടമാണെന്നും കണ്ടെത്തിയത്. ഇതോടെ ബാങ്ക് അധികൃതർ പോലീസിൽ പരാതി നൽകുകയായിരുന്നു.
തുടർന്ന് വണ്ടൂർ പോലീസ് നടത്തിയ അന്വേഷണത്തിലാണ് അസ്കറിലേക്ക് അന്വേഷണം എത്തിയത്. വിവിധ ബാങ്കുകളിലെ ഇടപാടുകളും പണയപ്പെടുത്തിയ ആഭരണങ്ങളും പരിശോധിച്ചാണ് ഇയാളെ പിടികൂടിയത്. ബാങ്കുകളെ ലക്ഷ്യമിട്ട് സമാന രീതിയിൽ നടത്തിയ ഇടപാടുകൾ സംബന്ധിച്ചും പോലീസ് അന്വേഷണം തുടരുകയാണ്.
