ന്യൂഡൽഹി: തദ്ദേശീയമായി വികസിപ്പിച്ച സിഗ്‌നലിംഗ് സാങ്കേതികവിദ്യയുടെ അന്തിമ ഫീൽഡ് ട്രയലുകൾ വ്യാഴാഴ്ച ഡൽഹി മെട്രോയുടെ റെഡ് ലൈനിൽ ഉദ്ഘാടനം ചെയ്തതായി അധികൃതർ അറിയിച്ചു. ഇന്ത്യയിലെ ആദ്യത്തെ തദ്ദേശീയ ഓട്ടോമാറ്റിക് ട്രെയിൻ സൂപ്പർവിഷൻ സിസ്റ്റം(ഐ-എടിഎസ്) വികസിപ്പിച്ചെടുത്തത് ഡിഎംആർസിയുടെയും ഭാരത് ഇലക്ട്രോണിക്‌സ് ലിമിറ്റഡിന്റെയും (ബിഇഎൽ) സംയുക്ത സംഘമാണ്.
‘ഇന്ത്യയിലെ ആദ്യത്തെ i-ATS-ന്റെ അന്തിമ ഫീൽഡ് ട്രയൽസ് ഇന്ന് റെഡ് ലൈനിൽ ഞങ്ങളുടെ മാനേജിംഗ് ഡയറക്ടർ ഡോ. മംഗു സിംഗ്, മെട്രോ ഭവനിൽ ഡയറക്ടർമാരുടെയും മുതിർന്ന ഉദ്യോഗസ്ഥരുടെയും സാന്നിധ്യത്തിൽ ഉദ്ഘാടനം ചെയ്തു. ഡിഎംആർസി ട്വീറ്റ് ചെയ്തു. ഈ വികസനം മെട്രോ ട്രെയിൻ സിഗ്‌നലിംഗ് മേഖലയിൽ ഡിഎംആർസിയെ കൂടുതൽ സ്വാശ്രയമാക്കുകയും ഇന്ത്യാ ഗവൺമെന്റിന്റെ ‘മേക്ക് ഇൻ ഇന്ത്യ’ സംരംഭം വർദ്ധിപ്പിക്കുകയും ചെയ്യുമെന്ന് ഡിആർഎംസി ട്വീറ്റിൽ വ്യക്തമാക്കി.
കഴിഞ്ഞ വർഷം ഡിസംബർ 24ന് ഡൽഹി മെട്രോ അതിന്റെ പ്രവർത്തനത്തിന്റെ 20ാം വർഷത്തിലേക്ക് പ്രവേശിക്കുകയും ഐ-എടിഎസ് സാങ്കേതികവിദ്യയുടെ ഫീൽഡ് ട്രയൽ ആരംഭിക്കുകയും ചെയ്തു. എടിഎസ് ഒരു കമ്പ്യൂട്ടർ അധിഷ്ഠിത സംവിധാനമാണ്, അത് ട്രെയിൻ പ്രവർത്തനങ്ങൾ നിയന്ത്രിക്കുന്നു. ഓരോ മിനിറ്റിലും സർവീസുകൾ ഷെഡ്യൂൾ ചെയ്യുന്ന മെട്രോ പോലുള്ള ഉയർന്ന സാന്ദ്രതയുള്ള പ്രവർത്തനങ്ങൾക്ക് ഈ സംവിധാനം ഒഴിച്ചുകൂടാനാവാത്തതാണ്.
ഐ-എടിഎസ് തദ്ദേശീയമായി വികസിപ്പിച്ച സാങ്കേതികവിദ്യയാണ്, ഇത് ഇപ്പോൾ അത്തരം സാങ്കേതികവിദ്യകൾ കൈകാര്യം ചെയ്യുന്ന വിദേശ വ്യവസായികളിൽ നിന്ന് ഇന്ത്യൻ മെട്രോകളുടെ ആശ്രിതത്വം ഗണ്യമായി കുറയ്‌ക്കുമെന്ന് ഡൽഹി മെട്രോ റെയിൽ കോർപ്പറേഷൻ നേരത്തെ പറഞ്ഞിരുന്നു. ഈ നേട്ടത്തോടെ, മറ്റ് മെട്രോകളിലും റെയിൽവേ സംവിധാനങ്ങളിലും നടപ്പിലാക്കാൻ കഴിയുന്ന സ്വന്തം എടിഎസ് ഉൽപ്പന്നമുള്ള ലോകത്തിലെ ചുരുക്കം ചില രാജ്യങ്ങളിലൊന്നായി ഇന്ത്യ മാറുമെന്നും അവർ പറഞ്ഞു.
‘സിബിടിസി സിഗ്‌നലിംഗ് സിസ്റ്റത്തിന്റെ ഒരു പ്രധാന ഉപസംവിധാനമാണ് ഐ-എടിഎസ് എന്നതിനാൽ, മെട്രോ റെയിൽവേയ്‌ക്കായി തദ്ദേശീയമായി നിർമ്മിച്ച സിബിടിസി (കമ്മ്യൂണിക്കേഷൻ ബേസ്ഡ് ട്രെയിൻ കൺട്രോൾ) അടിസ്ഥാനമാക്കിയുള്ള സിഗ്‌നലിംഗ് സാങ്കേതികവിദ്യയുടെ വികസനത്തിലേക്കുള്ള ഒരു പ്രധാന ചുവടുവയ്പ്പാണ് ഐ-എടിഎസ് സിസ്റ്റത്തിന്റെ വികസനം ഡിഎംആർസി വ്യക്തമാക്കി.
