കൊല്ലം: കാറിൽ കഞ്ചാവ് കടത്താൻ ശ്രമിച്ച നാലു പേർ പിടിയിൽ. ആറ്റിങ്ങൽ കിഴുവില്ലം പറയത്ത് കോണം പടിഞ്ഞാറ്റെവിള പുത്തൻ വീട്ടിൽ വിഷ്ണു(27) ഭാര്യ സൂര്യ,കൊല്ലം തൃക്കടവൂർ മുരന്തൽ ചേരി സരിതാ ഭവനിൽ അഭയ് ബാബു(21) കൊല്ലം കടപ്പാക്കട ശാസ്ത്രി ജംഗ്ഷനിൽ ഇടയിലഴികം പുരയിടത്തിൽ വാടകയ്ക്ക് തമാസിക്കുന്ന ഉണ്ണികൃഷ്ണൻ (27) എന്നിവരാണ് അറസ്റ്റിലായത്.
ദേശീയപാതയിൽ നീണ്ടകര ചിലാന്തി ജംഗ്ഷൻ സമീപത്തുനിന്നാണ് പ്രതികൾ വലയിലായത്.വിശാഖപട്ടണത്തിൽ നിന്നും കാറിൽ കൊല്ലം നഗരത്തിലേക്ക് കൊണ്ടുപോകുകയായിരുന്ന 25 കിലോ കഞ്ചാവാണ് പ്രതികളിൽ നിന്നും പിടികൂടിയത്.
തിരുപ്പതിയിൽ ക്ഷേത്ര ദർശനം നടത്തി മടങ്ങുന്നുവെന്ന വ്യാജേനെ ഇവർ കഞ്ചാവ് കടത്തുകയായിരുന്നു.കാറിന്റെ ഡോറിന്റെ ഭാഗത്ത് പൊതികളിലാക്കിയായിരുന്നു ഇവർ കഞ്ചാവ് സൂക്ഷിച്ചിരുന്നത്.പ്രതികളിലൊരാളായ ഉണ്ണികൃഷ്ണന് വേണ്ടിയാണ് കഞ്ചാവ് കടത്തികൊണ്ട് വന്നത്.
കൊല്ലം സിറ്റി ഡാൻസാഫും ചവറ പോലീസും സ്പെഷൽ ബ്രാഞ്ചും സംയുക്തമായി നടത്തിയ പരിശോധനയിലാണ് കഞ്ചാവ് കണ്ടെടുത്തത്. സമാനമായ രീതിയിൽ പ്രതികൾ നേരത്തേയും കഞ്ചാവ് കടത്തിയതായാണ് വിവരം.
