തിരുവനന്തപുരം: പണിമുടക്കിനെതിരായ ഹൈക്കോടതി ഉത്തരവിനെതിരെ അതൃപ്തി പ്രകടിപിച്ച് സിപിഎം നേതാവ് ആനത്തലവട്ടം ആനന്ദൻ. പണിമുടക്ക് തടയാൻ കോടതിക്ക് എന്ത് അവകാശമാണ് ഉള്ളതെന്നും തൊഴിലാളികൾക്ക് മാത്രമാണ് പണിയെടുക്കാനും മുടക്കാനുമുള്ള സ്വാതന്ത്ര്യമെന്നും ആനത്തലവട്ടം ചൂണ്ടിക്കാട്ടി.
സർക്കാർ പ്രഖ്യാപിച്ച ഡയസ്നോൺ സമരത്തെ ബാധിക്കില്ലെന്ന് വ്യക്തമാക്കിയ അദ്ദേഹം, തൊഴിലാളികൾ നക്കാപ്പിച്ച ആനുകൂല്യം നഷ്ടപ്പെടുമെന്ന് കരുതി പിൻമാറുന്നവരല്ലെന്നും പ്രതികരിച്ചു. കോടതി ഉത്തരവ് പ്രകാരം സർക്കാർ ഡയസ്നോൺ പ്രഖ്യാപിച്ച സാഹചര്യത്തിൽ നാളെ ജീവനക്കാർ ഓഫീസിലെത്താൻ ഇരിക്കെയാണ് സിപിഎം നേതാവിന്റെ അഭിപ്രായ പ്രകടനം.
അതേസമയം രണ്ട് ദിവസത്തെ ദേശീയ പണിമുടക്ക് സംബന്ധിച്ച് പുതിയ മാർഗ നിർദേശങ്ങൾ ഇന്ന് പുറത്തുവന്നിരുന്നു. കോഴിക്കോട് ജില്ലയിൽ പെട്രോൾ പമ്പുകൾ തുറന്ന് പ്രവർത്തിക്കണമെന്ന് ജില്ലാ കളക്ടർ ആവശ്യപ്പെട്ടിട്ടുണ്ട്. സർക്കാർ ഓഫീസുകളിൽ നാളെ ഹാജരാകാത്തവർക്കെതിരെ നടപടി സ്വീകരിക്കും.
