നൂറിന് മുകളിൽ വയസ്സുണ്ട് എന്നാലും പ്രായപൂർത്തിയായിട്ടില്ല. കേട്ടാപ്പോൾ ഒന്ന് ഞെട്ടി അല്ലേ. എന്തായാലും ആരും അത്ഭുപ്പെടേണ്ട 200 ഓളം വർഷം ജീവിക്കുന്ന അപൂർവ്വ ഇനത്തിൽ പെട്ട ഗ്രീൻലാന്റ് സ്രാവുകളെക്കുറിച്ചാണ് നമ്മൾ പറഞ്ഞുവരുന്നത്.
ഇംഗ്ലണ്ടിലെ കോൺവാളിലുള്ള ന്യൂലിൻ ഹാർബർ തീരത്ത് വന്നടിഞ്ഞ അപൂർവ ഇനത്തിൽപ്പെട്ട സ്രാവ് ഗവേഷകരെ വരെ അത്ഭുതപ്പെടുത്തിയിരിക്കുകയാണ്. നാലു മീറ്ററിനടുത്ത് വലുപ്പമുള്ള പെൺ സ്രാവിനെ ടൂർ ഏജൻസിയായ മെർമെയ്ഡ് പ്ലഷർ ട്രിപ്പ്‌സിലെ ജോലിക്കാരാണ് കണ്ടെത്തിയത്. കാഴ്ചയിൽ സാധാരണ സ്രാവുകളിൽ നിന്നും വ്യത്യസ്തമായിരുന്നതിനാൽ ചത്ത സ്രാവിനെ ഏജൻസിലിയെ ജോലിക്കാർ പരിശോധനയ്‌ക്കായി സമുദ്രഗവേഷകർക്ക് നൽകി. വിശദമായ ഗവേഷണത്തിലാണ് ഇത് ഗ്രീൻലാന്റ് സ്രാവാണെന്ന് കണ്ടെത്തിയത്. കോൺവാൾ മറൈൻ പാതോളജി സംഘം സ്രാവിന്റെ ജഡം പോസ്റ്റ്‌മോർട്ടത്തിന് വിധേയമാക്കി. യുകെയിൽ തന്നെ ഇതാദ്യമായാണ് ഒരു ഗ്രീൻലാന്റ് സ്രാവിന്റെ പോസ്റ്റ്മോർട്ടം നടത്തുന്നത്.
സമുദ്രത്തിലെ ആഴം കൂടിയ തണുപ്പുള്ള സ്ഥലങ്ങളിലാണ് ഈ ഇനത്തിൽ പെട്ട സ്രാവുകളെ കണ്ടുവരുന്നത്. സ്രാവിന് 100 വയസിന് മുകളിൽ പ്രായമുണ്ടാകും എന്നാണ് ഗവേഷകരുടെ കണ്ടെത്തൽ. എന്നാൽ ഇതിന് ഇപ്പോഴും പ്രായപൂർത്തിയായിട്ടില്ല. ഗ്രീൻലൻഡ് സ്രാവുകളിലെ പെൺ വർഗങ്ങൾക്ക് പ്രത്യുൽപാദനശേഷി ഉണ്ടാവുന്നത് 150 വയസ്സ് ആകുമ്പോഴാണ്. അപ്പോഴേക്കും അവയ്‌ക്ക് നാലര മീറ്ററിനു മുകളിൽ നീളമുണ്ടാകും. തീരത്തടിഞ്ഞ സ്രാവിന് 3.96 മീറ്റർ മാത്രമാണ് നീളം.
ഗ്രീൻലൻഡ് സ്രാവുകളെ കണ്ടെത്തുന്നത് അപൂർവമായതിനാൽ അവയുടെ ജീവിതത്തെക്കുറിച്ച് കൂടുതൽ പഠനങ്ങളൊന്നും നടന്നിട്ടില്ല. അത്തരമൊരു പഠനം നടത്താൻ സുവർണാവസരം ലഭിച്ചതിന്റെ സന്തോഷത്തിലാണ് ഗവേഷകർ. പഠനത്തിലൂടെ ഗ്രീൻലൻഡ് സ്രാവുകളുടെ ഭക്ഷണക്രമം എങ്ങനെയാണെന്നും സമുദ്ര മലിനീകരണം അവയെ എങ്ങനെ ബാധിച്ചിട്ടുണ്ടെന്നുമെല്ലാം കണ്ടെത്താനാകുമെന്നും ഗവേഷകർ പ്രതീക്ഷിക്കുന്നു.
