മുംബൈ: പ്രശസ്ത നൃത്ത സംവിധായകൻ ഗണേഷ് ആചാര്യയ്ക്കെതിരായ ലൈംഗിക പീഡന പരാതിയിൽ കുറ്റപത്രം സമർപ്പിച്ച് പോലീസ്. 2021ൽ അദ്ദേഹത്തിന്റെ സഹ നർത്തകരിൽ ഒരാൾ സമർപ്പിച്ച പരാതിയിലാണ് നടപടി. അന്ധേരിയിലെ മെട്രോപൊളിറ്റൻ മജിസ്ട്രേറ്റ് കോടതിയിൽ കുറ്റപത്രം സമർപ്പിച്ചതായി ഒഷിവാര പോലീസ് ഓഫീസർ സന്ദീപ് ഷിൻഡെ അറിയിച്ചു.
സാമന്തയുടെ നൃത്തച്ചുവടുകൾ കൊണ്ട് ശ്രദ്ധേയമായ ‘പുഷ്പ’ സിനിമയിലെ ഊ അന്തവ… ഗാനം കൊറിയോഗ്രാഫി ചെയ്തത് ഗണേഷ് ആചാര്യയാണ്. ഗണേഷ് ആചാര്യയ്ക്കും സഹായിക്കും എതിരെയാണ് യുവതി പരാതി നൽകിയിരുന്നത്. ഇന്ത്യൻ ശിക്ഷാ നിയമത്തിലെ 354 എ, 354സി, 354 ജി, 509, 323, 506, എന്നീ വകുപ്പുകൾ ചുമത്തിയാണ് കേസെടുത്തിരിക്കുന്നത്. സംഭവത്തിൽ ഗണേഷ് ആചാര്യ ഇതുവരെ പ്രതികരിച്ചിട്ടില്ല.
ലൈംഗിക ബന്ധം ആവശ്യപ്പെട്ടപ്പോൾ നിരസിച്ചതിന് ആചാര്യ തന്നെ ഉപദ്രവിക്കാൻ തുടങ്ങിയെന്നാണ് പരാതിയിൽ പറയുന്നത്. ഇൻഡസ്ട്രിയിൽ വിജയിക്കണമെങ്കിൽ താനുമായി ലൈംഗിക ബന്ധത്തിൽ ഏർപ്പെടണമെന്ന് അയാൾ 2021 മെയ് മാസത്തിൽ തന്നോട് പറഞ്ഞതായി യുവതി പറയുന്നു. ഗണേഷ് ആചാര്യയുടെ വനിതാ സഹായികൾ മർദ്ദിച്ചതായും പരാതിയിൽ പറയുന്നുണ്ട്.
Comments