ഇന്ത്യന്‍ നാവികസേനയുടെ കരുത്ത് കൂട്ടാന്‍ ‘സമര്‍ഥക്’; തദ്ദേശീയമായി നിര്‍മിച്ച മള്‍ട്ടി പര്‍പ്പസ് കപ്പല്‍ കമ്മീഷന്‍ ചെയ്തു

കര്‍വാര്‍: ഇന്ത്യന്‍ നാവികസേനയുടെ പുതിയ മള്‍ട്ടി പര്‍പ്പസ് കപ്പലായ ‘സമര്‍ഥക്’ ഇന്ന് കമ്മീഷന്‍ ചെയ്തു. കര്‍ണാടകയിലെ കര്‍വാര്‍ നാവികത്താവളത്തില്‍ നടക്കുന്ന ചടങ്ങില്‍ ഉപരാഷ്‌ട്രപതി സി. പി. രാധാകൃഷ്ണന്‍ പങ്കെടുക്കും. പ്രതിരോധ മേഖലയില്‍ സ്വയംപര്യാപ്തത കൈവരിക്കാനുള്ള ഇന്ത്യയുടെ ശ്രമങ്ങള്‍ക്ക് കരുത്തുപകരുന്ന മറ്റൊരു ചുവടുവയ്പ്പായാണ് കപ്പലിന്റെ കമ്മീഷനിങ്ങിനെ പ്രതിരോധ മന്ത്രാലയം വിലയിരുത്തുന്നത്. കേന്ദ്രസര്‍ക്കാരിന്റെ ‘മെയ്‌ക്ക് ഇന്‍ ഇന്ത്യ’ പദ്ധതിയുടെ ഭാഗമായി ലാര്‍സന്‍ ആന്‍ഡ് ടൂബ്രോ ലിമിറ്റഡാണ് കപ്പല്‍ നിര്‍മിച്ചത്. ഇന്ത്യന്‍ നാവികസേനയില്‍ ഉള്‍പ്പെടുത്തുന്ന രണ്ട് മള്‍ട്ടി പര്‍പ്പസ് കപ്പലുകളില്‍ ആദ്യത്തേതാണ് സമര്‍ഥക്. ഭാവിയിലെ തന്ത്രപ്രധാന ദൗത്യങ്ങള്‍ക്കായി നാവികസേനയ്‌ക്ക് ഉപയോഗിക്കാവുന്ന ബഹുമുഖ കപ്പലായാണ് ഇത് രൂപകല്‍പ്പന ചെയ്തിരിക്കുന്നത്.

സമുദ്ര നിരീക്ഷണവും പട്രോളിങ്ങുമാണ് സമര്‍ഥക്കിന്റെ പ്രധാന ചുമതലകള്‍. കുറഞ്ഞ തീവ്രതയിലുള്ള സമുദ്ര പ്രവര്‍ത്തനങ്ങള്‍, ലക്ഷ്യങ്ങള്‍ വിന്യസിക്കുന്നതിനും പരീക്ഷണങ്ങള്‍ നടത്തുന്നതിനുമുള്ള പ്ലാറ്റ്ഫോം, ആളില്ലാ-സ്വയംഭരണ സംവിധാനങ്ങള്‍ക്കുള്ള മാതൃകപ്പല്‍ തുടങ്ങിയ നിലകളിലും ഇത് പ്രവര്‍ത്തിക്കും. മാനുഷിക സഹായം, ദുരന്തനിവാരണം, പരിമിതമായ ആശുപത്രിക്കപ്പലായി മാറ്റാനുള്ള സൗകര്യം, രക്ഷാപ്രവര്‍ത്തനങ്ങള്‍ എന്നിവയ്‌ക്കും കപ്പല്‍ ഉപയോഗിക്കാനാകും. വ്യത്യസ്ത സമുദ്ര സാഹചര്യങ്ങളില്‍ വിവിധ ദൗത്യങ്ങള്‍ ഏറ്റെടുക്കാന്‍ കഴിയുന്ന തരത്തിലാണ് കപ്പലിന്റെ രൂപകല്‍പ്പന. ഇന്ത്യയില്‍ വികസിപ്പിച്ച സെന്‍സറുകള്‍, ആയുധങ്ങള്‍, ഇലക്ട്രോണിക് സംവിധാനങ്ങള്‍ എന്നിവ സംയോജിപ്പിച്ച കോംബാറ്റ് സംവിധാനമാണ് സമര്‍ഥക്കിലുള്ളത്.

Don’t miss the latest breaking news and updates! Subscribe to Janam TV’s WhatsApp channel now…

https://whatsapp.com/channel/0029Va4LMqWE50UdrVhraq0y

വെല്ലുവിളി നിറഞ്ഞ സമുദ്രാന്തരീക്ഷത്തില്‍ പ്രവര്‍ത്തിക്കാന്‍ അനുയോജ്യമായ രീതിയിലാണ് ഈ സംവിധാനങ്ങള്‍ ക്രമീകരിച്ചിരിക്കുന്നത്. കപ്പലിന്റെ ചിഹ്നത്തില്‍ തിരമാലകള്‍ക്കിടയില്‍നിന്ന് ഉയര്‍ന്നുവരുന്ന ആനയെയാണ് ചിത്രീകരിച്ചിരിക്കുന്നത്. ശക്തി, ബുദ്ധിശക്തി, ചുറുചുറുക്ക് എന്നിവയുടെ പ്രതീകമായാണ് ആനയെ അവതരിപ്പിച്ചിരിക്കുന്നത്. ‘വിജയമാണ് നമ്മുടെ ഏക ലക്ഷ്യം’ എന്നതാണ് സമര്‍ഥക്കിന്റെ ആപ്തവാക്യം. പ്രതിരോധ ഉപകരണങ്ങളുടെ തദ്ദേശീയ നിര്‍മാണം പ്രോത്സാഹിപ്പിക്കുന്നതിലൂടെ വിദേശ ആശ്രിതത്വം കുറയ്‌ക്കാനും നാവികസേനയുടെ പ്രവര്‍ത്തനശേഷി വര്‍ധിപ്പിക്കാനും ലക്ഷ്യമിടുന്ന ഇന്ത്യയുടെ പ്രതിരോധ സ്വയംപര്യാപ്തതാ പദ്ധതിയിലെ പ്രധാന മുന്നേറ്റമായിരിക്കും സമര്‍ഥക്കിന്റെ കമ്മീഷനിങ്.