മുംബൈ : ബിജെപി വിരുദ്ധ മുന്നണിയെ നയിക്കാൻ തനിക്ക് സാധിക്കില്ലെന്ന് എൻസിപി നേതാവ് ശരദ് പവാർ. തനിക്ക് ആ സ്ഥാനത്തോട് താത്പര്യം ഇല്ലെന്നും ഉത്തരവാദിത്വം താൻ ഏറ്റെടുക്കില്ലെന്നും പവാർ പറഞ്ഞു. ബിജെപിക്കെതിരെ പൊരുതാനാണ് പ്രതിപക്ഷ പാർട്ടികളുടെ സമ്മതത്തോടെ യുപിഎ രാഷ്ട്രീയ കൂട്ടായ്മ ഒരുങ്ങുന്നത്. ഇവരെ ഒന്നിച്ച് നിർത്താൻ പവാറിന് കഴിയുമെന്ന് ശിവസേന അഭിപ്രായപ്പെട്ടിരുന്നു. ഇതിന് പിന്നാലെയാണ് പവാർ വിശദീകരണവുമായി രംഗത്തെത്തിയത്.
ബിജെപിക്കെതിരെ പ്രതിപക്ഷ പാർട്ടികളുടെ കൂട്ടായ്മയെ നയിക്കാൻ തനിക്കാകില്ലെന്ന് അദ്ദേഹം പറഞ്ഞു. കോൺഗ്രസ് മാറ്റി നിർത്താൻ സാധിക്കാത്ത പാർട്ടിയാണ്. തിരഞ്ഞെടുപ്പിൽ പരാജയപ്പെട്ടെങ്കിലും ആ പാർട്ടിയുടെ സാന്നിദ്ധ്യം ഇന്ത്യയിലുടനീളം ഉണ്ട്. ബിജെപിക്കെതിരെ മത്സരിക്കാൻ കോൺഗ്രസിന് മാത്രമേ സാധിക്കൂ എന്നും പവാർ കൂട്ടിച്ചേർത്തു. രാജ്യത്ത് പണപ്പെരുപ്പം വർദ്ധിച്ചിരിക്കുകയാണ്. പാവങ്ങളെ ഇത് നന്നായി ബാധിക്കുമെന്ന് അദ്ദേഹം പറഞ്ഞു.
വിവേക് അഗ്നിഹോത്രി സംവിധാനം ചെയ്ത ദ കശ്മീർ ഫയൽസ് എന്ന ചിത്രത്തെയും അദ്ദേഹം വിമർശിച്ചു. ചിത്രത്തിൽ യഥാർത്ഥ സംഭവങ്ങളല്ല നടന്നത് എന്നാണ് പവാറിന്റെ ന്യായീകരണം. മറ്റ് മതവിശ്വാസികളിൽ വെറുപ്പ് ഉളവാക്കുന്ന തരത്തിലാണ് ചിത്രം നിർമ്മിച്ചിരിക്കുന്നത് എന്നും അദ്ദേഹം വ്യക്തമാക്കി.
