ലാസ് വെഗാസ് : ഇന്ത്യൻ-അമേരിക്കൻ ഗായിക ഫാൽഗുണി ഷാ ഗ്രാമി പുരസ്കാരത്തിന് അർഹയായി. ‘ എ കളർഫുൾ വേൾഡ്’ എന്ന ആൽബത്തിനാണ് ബെസ്റ്റ് ചിൽഡ്രൻസ് മ്യൂസിക് ഗ്രാമി ലഭിച്ചത്. ഫാലു എന്നറിയപ്പെടുന്ന ഫാൽഗുണി തന്നെയാണ് ഇൻസ്റ്റഗ്രാമിലൂടെ ഇക്കാര്യം അറിയിച്ചത്. സംഗീതത്തിലെ ഓസ്കാർ എന്നറിയപ്പെടുന്ന പുരസ്കാരമാണ് ഗ്രാമി പുരസ്കാരം.
ഈ ദിവസത്തെ അത്ഭുതം വാക്കുകളിലൂടെ പങ്കുവെക്കാൻ സാധിക്കുന്നില്ല എന്ന് ഫാൽഗുണി കുറിച്ചു. ഗ്രാമി പ്രീമിയർ സെറിമണിയുടെ ഉദ്ഘാടന ചടങ്ങിൽ പങ്കെടുക്കാനും പരിപാടി അവതരിപ്പിക്കാനും തുടർന്ന് പുരസ്കാരം നേടാനും സാധിച്ചത് വലിയ ബഹുമതിയായി കരുതുന്നു. ‘എ കളർഫുൾ വേൾഡ്’ എന്ന ഗാനത്തിന് വേണ്ടി പ്രവർത്തിച്ച എല്ലാവർക്കും നന്ദിയറിയിക്കുന്നതായി താരം പറഞ്ഞു. പുരസ്കാരത്തിന് വേണ്ടി പരിഗണിച്ചതിന് റെക്കോർഡിംഗ് അക്കാദമിക്കും താരം പ്രത്യേകം നന്ദി അറിയിച്ചു.
2007 ലാണ് ഫാൽഗുണി തന്റെ സോളോ ആൽബം റിലീസ് ചെയ്തത്. തെക്ക് കിഴക്കൻ ഏഷ്യയിലുടനീളമുള്ള നാടോടി രീതികളെ പാശ്ചാത്യ സംഗീതവുമായി സംയോജിപ്പിച്ചാണ് ആൽബം നിർമ്മിച്ചത്. ബെസ്റ്റ് ചിൽഡ്രൻസ് മ്യൂസിക് ആൽബം എന്ന വിഭാഗത്തിലേക്ക് പേര് നാമനിർദ്ദേശം ചെയ്യപ്പെടുന്ന ആദ്യത്തെ ഇന്ത്യക്കാരി കൂടിയാണ് ഫാൽഗുണി. എആർ റഹ്മാനോടൊപ്പം ഇവർ പരിപാടിയും അവതരിപ്പിച്ചിട്ടുണ്ട്.
Comments